32歲YouTuber張天允不敵癌魔離世 家人IG公佈死訊

90後抗癌YouTuber張天允（Tiffany），曾參與ViuTV節目《對不起幫緊你》及《21克公寓》做嘉賓。佢喺27歲嗰年確診子宮頸腺癌2B期，熱愛生命嘅佢表現堅強，一直勇敢抗癌，可惜上月病逝，終年32歲。

前日，Tiffany家人喺嘅IG上載黑白照公佈其死訊及安息禮日期：「感謝大家一直的支持，Tiffany 早前病況急轉直下，於三月經已安息主懷。 安息禮訂於2024年4月27日（六）下午2:00-3:30在教堂舉行。大家可於線上參與，一同懷念她。」

熱愛生命嘅Tiffany雖然曾經被指只餘幾月命，不過佢依然樂觀面對，拒絕醫生建議化療等療法，選擇以中醫及自然療法。Tiffany不時拍片交代抗癌情況，上年更與一眾抗癌勇士去泰國清邁旅行，雖然當時佢已經行動不便，需要用拐杖步行甚至要坐輪椅，仲要不停食止痛藥，但佢依然堅強面對，活出精彩人生。另外佢仲去日本、泰國及馬爾代夫等地旅行。

Tiffany離世消息公佈後，唔少網民紛紛留言作最後悼念，例如「感謝你勇敢分享自己的抗癌經歷 願你在天國不再有病痛，快樂平安 RIP 家人好好保重」、「多謝你生前拍片，令我有幸透過網絡認識你既勇敢同經歷，Tiffany那美好的仗已經打完，願你主懷安息，而你家人，你既男朋友都平安」、「你鼓勵左好多癌症患者和家人，看到你的笑容覺得世界好溫暖。謝謝你，走好。」、「抗癌期間開始睇妳嘅YouTube，好勵志鼓勵，好多謝妳嘅片一路支持住我走過嗰段日子，RIP」及「R.I.P 感謝你的勇敢、活出信仰，生命影響了很多人」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！