4個令人印象深刻嘅劇集奸角

廖啟智－劉謹昌《律政強人》

智叔嘅演技人所共知無得頂，最佳男配角非佢莫屬，基本上智叔一出鏡，觀眾都唔記得咗主角嘅存在。事隔多年，智叔重次回歸TVB拍劇，今次就喺劇集《律政強人》就做一個為求上位，得到權力而無所不用其極嘅律師行執行合夥人。智叔喺劇入面手段高明，既為打贏官司暗示客戶毀滅證據，又利用人脈關係設個局拉劉丹飾演嘅卓繼堯落馬，最緊要仲識暗中牽制各人成為佢嘅棋子。智叔無論樣貌、言語都完美示範咩叫老狐狸，雖然小編都覺得略嫌用力咗啲，不過考慮到可能智叔拍開最多2個鐘嘅電影，習慣咗每場戲都要夠張力先會咁。而且難得有好戲之人拍劇，咁就撐吓智叔啦～

陳錦鴻－許文彪《創世紀》

要講到經典奸角，一定唔可以唔提宜家晚晚都播嘅劇集《創世紀》入面，陳錦鴻飾演嘅許文彪。劇集初頭陳錦鴻明明好似係正人君子，非常之正直，極度堅持自己是非黑白分明嘅原則。當觀眾以為陳錦鴻又係做返佢一貫好人角色，但後來慢慢因為家人、朋友、同事等等嘅影響，再加上佢錯手殺咗第一個人之後，佢就開始變得不擇手段，作奸犯科。雖然佢做嘅事係唔啱，但諗到佢都係為勢所迫，特別係最經典佢講「我唔係未試過」嗰段說話，講到呢個世界唔公平呢樣嘢，真係連觀眾都身同感受，忍唔住有啲同情佢。呢個角色到宜家都仲有好多人提，就證明陳錦鴻嘅奸角演出幾成功啦。

郭晉安－唐立言《與敵同行》

郭晉安演技一向都好，基本上好多角色佢都handle到，做喜劇又得，做傻仔又得，但唔少觀眾最鍾意都係睇佢做奸角。《與敵同行》呢套劇集唔係走一般路線，正常劇集嘅壞人都其實唔係壞得哂，總會有良心發現嘅一刻。但郭晉安喺呢套劇簡直好似無咗人嘅道德觀念咁，完完全全係一個偽善者，將自己扮得有情有義嘅好形象去控制身邊所有人。但當有人唔服從，佢就會想盡辦法去鏟除佢哋，無論對嫲嫲、養母、妹妹定女友，都會用心理或生理折磨去控制佢哋而毫無憐惜之心。到後來被拆穿偽善嘅面目，佢直情唔再掩飾，甚至去到歇斯底里嘅地步。最後就算入咗獄，佢兇狠嘅眼神、行為未有改變，甚至只係想快啲出獄報仇，徹頭徹尾唔覺得自己錯。郭晉安呢個做到人性本惡嘅唐立言令人非常印象深刻，之後喺劇集《忠奸人》再次挑戰奸角，更加為佢帶嚟第3個視帝獎項。

同場加映－「完美奸人」鄭子誠

無論宜家鄭子誠做咩戲，就算做好人角色都好，觀眾都只會覺得佢一定有陰謀。因為鄭子誠實在做過太多奸角，好似長篇處境劇《真情》嘅反派角色李子浩深入民心；劇集《洛神》又做深謀遠慮嘅司馬懿；劇集《烈火雄心》更喺雨中強姦梁琤、殺死自己助手、仲推養父落山，壞事做盡。由於奸角形象太深刻，所以就算佢做正派角色都好，大家都會猜測佢之後會奸，甚至有網民連佢為資訊節目《水之源》擔任旁白都覺得佢有陰謀。所以話講到最佳劇集奸角，一定非散發住奸人氣息嘅鄭子誠莫屬。

圖片來源：TVB.com