4拍4家族｜謝安琪入圍金像獎最佳女主角惹爭議 張繼聰公開力撐

《第四十二屆香港電影金像獎》日前（6日）公布19項獎項提名名單，其中「最佳女主角」提名人選為《4拍4家族》謝安琪、《不日成婚2》衛詩雅、《白日之下》余香凝、《毒舌大狀》王丹妮及《填詞L》鍾雪瑩，五位之中有三位都係首次入圍影后，惹起爭議，網民紛紛認為今屆「最佳女主角」提名名單卡士極弱，部分戲仲要未睇過；當中網民對謝安琪有份入圍最不滿。

謝安琪於IG發文分享入圍心情及感謝一班入場支持《4拍4家族》嘅觀眾、台前幕後工作人員，寫道：「收到同事打來，跟我說自己獲得金像獎兩項提名「最佳女主角」及「最佳電影原創歌曲」，內心的激動難以言喻，一時間情緒太多，竟然在街上不顧一切的大叫大哭，這是我人生第一次獲得金像獎的提名呀。然後，慢慢地，一點一滴地回憶拍攝和主題曲錄音，許多感受湧上心頭。」同樣有份入圍「最佳女主角」嘅余香凝及楊潮凱、倪晨曦、蔡穎恩、趙慧珊等都有留言恭喜。

謝安琪當年以歌手身份出道，力Sell實力派，隨後嘗試過唔同曲風，又接觸拍劇。2014年，謝安琪為老公張繼聰有份出演嘅TVB劇集《老表，你好hea！》客串「Kay BB」一角；之後於2016年參演TVB劇集《殭》女主角「藍夢南」，當時就被批過份造作。事隔多年，早前謝安琪飾演ViuTV劇集《法與情》女主角「Angel郭恩琪」亦被狠批表情誇張，演技未夠班。對於謝安琪今次入圍金像獎「最佳女主角」，網民就持不同意見，部分網民覺得謝安琪已經進步咗好多，認為其實佢演得唔差，一向公認寵妻嘅張繼聰為謝安琪挺身而出，留言：「多謝支持」；但部分網民就對謝安琪入圍感不解：「謝安琪都有得提名真係」、「今年女主提名絕對係史上最垃圾」、「今年見謝安琪都入到就知」、「金像獎仲有咩公信力，自己行內人圍爐取暖」、「謝安琪同王丹妮就真係湊數」、「今年個最佳女主角得淡笑」、「今年女主提名絕對係史上最垃圾」等等。

對於網民意見，謝安琪大方回應，表示收到晒網民意見，又希望大家可以畀《4拍4家族》一個機會，指《4拍4家族》喺佢心目中係非常值得欣賞既作品，非常榮幸可以參與拍攝擔任女主角：「本片今日仍在上映中，如果大家對呢部電影得到嘅任何提名感到好奇，歡迎大家入埕觀看，給予呢部電影一個機會，亦都給予我一個機會。大家嘅意見，我都收到了。我會繼續努力，希望終有一日得到你嘅一份支持。」而張繼聰又於自己IG PO出合照並寫道：「叻叻，你嘅努力冇白費，以你為榮。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！