72歲李龍基大讚36歲未婚妻高質 自感有壓力要𥄫實啲

被稱為TVB「御用皇帝」嘅72歲李龍基，與相差36年嘅女友Chris Wong展開「爺孫戀」，唔經唔覺二人已經拍拖4年，今年初基哥接受傳媒訪問時仲話計劃於今年內與Chris拉埋天窗。早前基哥為中成藥品牌嘅男士系列產品拍攝廣告，佢仲分享自己嘅精壯活力嘅心得添呀！

雖然李龍基已經72歲，不過佢喺20年前已經開始注重保健，除咗唔煙唔酒之外，佢嘅生活亦非常檢點，所以佢表示自己依然有心有力。對於拍攝男士保健產品廣告，佢就話一啲都唔尷尬，因為年紀大就需要補充，令到某方面嘅功能保持正常，因為如果人類冇呢個行為就會絕種，所以佢覺得好嘅產品就會推薦。

李龍基被問到外界形容佢同女友係「爺孫戀」，佢就話愛情係唔會有年齡區分，因為最重要嘅大家真心對大家。李龍基仲話自己已經不自覺咁迎合咗Chris，無論說話定係處事方式都變得後生咗。

另外，李龍基仲為自己有個年輕貌美嘅高質女友感到自豪，不過同時亦為此感到有壓力，因為呢個世界有好多男士都鍾意呢個類型嘅女士，所以佢要𥄫實啲。

李龍基係圈中嘅隱形富豪，有傳佢喺中港兩地一共有7個物業，佢曾經講過怕自己先走一步，所以將名下7個物業全歸Chris名下，等佢可以有保障及生活無憂。咁二人婚後會唔會有生BB嘅計劃，基哥就話順其自然。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！