Alton王智德@MIRROR直播打機被讚貼地View數多過達哥？網民建議全職打機

MIRROR成員Alton王智德工作機會不敵其他隊員，新歌英文單曲《RUMOURS》MV出鏡率僅得3秒，亦係12子中最少嘅一員。Alton嘅工作表現喺網民印象中似乎唔係幾好，年頭播出嘅ViuTV劇集《大誠實家》雖然擔正，但就被狠批其造型及演技；網民仲話留意到Alton平日喺團體表演中經常甩beat及跳錯舞步，指佢喺各方面都無進步；惟近日Alton於個人YouTube Channel直播打機反而更受歡迎。

Alton嘅YouTube Channel顯示佢加入日期係2013年，但咁多年嚟只係得一首自創Rap歌曲《拜春 BAAI3 CEON1》片段，直至一個月前Alton開始每隔幾日就開Live打機玩《生化危機4》，雖然無露樣，但就一邊打機一邊同觀眾傾計，甚至炒熱氣氛。有網民就喺討論區開PO討論，雖然有部分網民踩Alton：「連打機都咁廢」、「霉到要去撈打機直播」等等；但其餘嘅留言大部分都大讚Alton呢種互動，覺得佢無架子超級貼地：「識做效果，得閒又會自嘲」、「肯同觀眾打成一片已經難能可貴」、「性格係幾好」、「如果喺大陸，可能一人課金100蚊都夠佢買樓」 等等。

事實上，Alton打機直播嘅影片平均每條都有逾1萬人觀看，又有粉絲開設IG專頁紀錄Alton打機搞笑畫面；有網民將Alton與達哥比較，指Alton YouTube直播觀看人數多過達哥，不過有心水清嘅網民就表示二人所用嘅直播平台唔同，Alton用YouTube，而達哥用Twitch，兩者客路及用戶習慣未必相同，唔可以用View數去比較。不過，討論Alton打機嘅留言都相對正面，仲有人留言支持佢全職打機，行出一條新出路。亦因為打機直播令一班連登仔對Alton加深印象，部分網民唔再惡搞Alton嘅英文名，而係直接用「Alton」作稱呼，有網民就留言表示見到有人打啱Alton個名好感動。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！