Anson Lo盧瀚霆回應神徒與姜濤fans肢體衝突事件︰為咗支持我而受傷，我覺得好唔值得

早前MIRROR完成北美巡迴演出回港，其中Anson Lo盧瀚霆及姜濤歌迷天未光就喺機場等候，而兩派fans更因為霸位問題而起衝突，有神徒（Anson Lo fans）更聲稱被人推跌而受傷。

Anson Lo尋日為新歌宣傳時接受訪問，提到該次衝突，佢話喺飛機上已經知道，當刻好緊張，立即了解有幾多人受傷。Anson Lo話「如果大家為咗支持我而受傷，我覺得好唔值得……如果受傷嘅話，我會好肉赤」。MIRROR成員Jeremy（李駿傑）得知「出事」都陪住Anson Lo，而阿Lo受訪時都公開多謝Jeremy「辛苦佢，佢同我一齊承受壓力，想同佢講聲對唔住」。

MIRROR成員當中，Anson Lo同姜濤人氣高企，佢地兩幫fans勢成水火亦係明眼人都睇得出。去年一個音樂節上，多位MIRROR成員獲邀表演，而Anson Lo緊接姜濤壓軸出場。網上有片段見到一批觀眾喺姜濤演出後離場，被指唔尊重Anson Lo。嚟緊6月Anson Lo同姜濤又會喺音樂節演出，對於能否避免再有磨擦，Anson Lo話當然唔想類似「機場事件」發生，佢重申安全最緊要，但係各方面仲搵緊方法去解決。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！