Avantgardey跳《科目三》惹爭議火速刪片 跳《打雀英雄傳》獲讚夠貼地

日本人氣舞團Avantgardey近日訪港，除咗為新春花車巡遊表演之外，亦有喺酒店、商場、海傍及與著名玄學家麥玲玲師傅跳舞，掀起熱潮。近期內地抖音神曲《科目三》爆紅，而Avantgardey亦湊熱鬧喺維港前跳埋一份，影片上載到IG後隨即引起爭議，短片喺上載一小時後火速刪除。去到今日下午，Avantgardey上載一條以歌神許冠傑《打雀英雄傳》作歌曲背景嘅跳舞短片，短片貼地獲網民激讚。

Avantgardey喺今日下午上載一條以歌神許冠傑《打雀英雄傳》作歌曲背景嘅跳舞短片，並由4位成員繼續以誇張表情及舞蹈演繹。影片出街後，唔少網民紛紛留言大讚貼地及搞笑，例如「呢d咪先係香港味道囉 Good!」、「Thanks for blending in the HK local culture」、「This one is fantastic! Cantonese classics!」、「This is truly Hong Kong」、「有誠意！！」、「你地真係好正，多謝avantgardey咁有心」、「Awesome song choice! Very old school Hong Kong!」、「wow what a surprise! its such a classic song. amazing! Thank you!」、「你地真係好正，多謝avantgardey咁有心」、「唔跳科目三抵你紅」、「點都好個（過）科目三呀」、「誠意十足」、「好搞笑用廣東歌」、「夠貼地，香港人最鐘意打返幾圈，連許冠傑神曲都識，果然入鄉隨俗」及「吓 睇左條片 好搞笑喎 唔好淨係識踩人啦」等等；不過亦有網民認為Avantgardey跳《打雀英雄傳》唔夾，留言話「跳番啲日本舞算啦，真係唔夾」、「幾有趣~ 不過呢啲間中攪下笑就OK, 但唔係好適合表演」、「同郭富城跳para para 櫻之花 可能仲好」、「好似出得太密 同埋佢地啲舞好睇在一致性 單獨/得幾個睇其實係麻麻」及「香港人癲到玻璃心到要一隊日本組合剩係跳香港既舞」等等。

內地抖音神曲《科目三》，全名係《廣西科目三》，原本係指中國駕駛考試嘅其中一個科目，不過後來因為喺廣西嘅一場婚宴上表現而爆紅。喺《科目三》變得廣為人知後，海底撈員工都有喺餐廳上為客人表現，從而製造驚喜。雖然內地人對歌曲非常受落，不過香港人就似乎麻麻哋。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！