香港5大bagel推介！人氣金莎Tiramisu、意大利黑松露醬炒滑蛋口味

Bagel口感煙煙韌韌又夠飽肚，無論做早餐、午餐或下午茶都係一個唔錯嘅選擇～而且Bagel變化多樣，無論鹹定甜都咁夾，睇吓以下呢5間bagel邊間啱你食～

招牌金莎Tiramisu Bagel MONO Lab

呢間中環西式咖啡店，主要供應bagel、蛋糕同飲品等～招牌金莎Tiramisu Bagel上面加咗滿滿mascarpone cheese同可可粉，內餡就係微微流心嘅朱古力醬同金莎；cheese打得好滑，雖然加咗醬，但唔影響bagel嘅煙韌口感，味道上比較重朱古力嘅香甜，酒同咖啡味就唔算太濃。

超多口味鹹甜Bagel Bagel Gogo

紅磡近期好流行嘅bagel專門店，無論鹹定甜嘅口味都做得好出色！呢間嘅選擇超級多，淨係睇ｍenu都已經眼花撩亂。最受歡迎係嘅芋泥肉鬆麻糬，bagel同麻糬都可以揀口味，好似抹茶bagel體配抹茶麻糬同芋泥，中間厚厚一層抹茶麻糬，口感煙韌帶淡淡抹茶香。另外鹹味有泡菜肥牛芝士、煙鴨胸配焦糖洋蔥同厚切雞扒菠蘿等，真係bagel控嘅天堂呀。

無油低糖自家製bagel Bagels Alley

想有健康啲嘅款式？中環呢間bagel店係唔錯嘅選擇。佢哋供應嘅係紐約風貝果麵包，標榜無油、少糖同無防腐劑，口感相對更煙韌同硬身。煙燻牛肉原味貝果入面有幾塊大大嘅煙燻牛肉，煙燻味濃郁又唔會太鹹，配埋黃芥辣、酸瓜、番茄、瑞士芝士、火箭菜同忌廉芝士，食晒成份都唔怕滯。貝果可以選擇唔同烘烤程度之外，佢哋重有3款素食選擇，好friendly呀！

意大利黑松露醬炒滑蛋貝果 SP_CE cafe & lounge

呢個分量十足嘅意大利黑松露醬炒滑蛋貝果係招牌菜呀～首先一上枱佢嘅滑蛋好似瀑布咁壯觀，有蛋香之餘，重勁多黑松露；切開有生菜同番茄，令口感更豐富同清新，貝果外脆內軟，就算底層嘅食到最後都保持香脆，好出色呀。

慢煮牛肉/伯爵蘋果貝果 留白

位於荃灣嘅咖啡小店，餐廳空間唔係好大，室內有10多個座位，啱晒想靜靜地chill吓嘅朋友。慢煮牛同煙燻三文魚兩款鹹味bagel都唔錯，前者煎得啱啱好，外面焦香，內裡有肉汁，軟硬度適中，配埋沙律菠菜、忌廉芝士、車打芝士同洋蔥作配料，非常惹味；後者就係傳統配搭，以鹹鹹香香嘅煙三文魚配忌廉芝士。甜味則有伯爵蘋果口味，夾咗伯爵忌廉芝士、焦糖蘋果，一啖食到又軟又硬嘅內餡，而蘋果非常爽甜，令成個bagel食落好清新，層次分明。

文: Yanica
編：Cathy