COLLAR預告1周年新歌 So Ching短片網民激讚：美麗勇敢的女孩

COLLAR成員So Ching自男朋友Mo於MIRROR演唱會意外受重傷後，一直停工照顧對方；期間COLLAR每次表演都唔齊人，甚至愈變愈少人，令部份網民覺得So Ching拖累成隊人力勸佢退團，不過COLLAR其餘7位成員一直主張「8-1=0」嘅態度等So Ching歸隊。日前，So Ching停工近半年終於復工歸隊出席《叱咤樂壇流行榜頒獎典禮》，COLLAR齊人表演出道歌《Call My Name!》之餘，更得到「生力軍組合金獎」及「組合銅獎」，跳唱《OFF/ON》時令唔少粉絲大表感動。芯駖於後台接受媒體訪問時表示COLLAR會全面復工，更透露即將會有出道1周年活動，包括推出新歌。

COLLAR官方社交平台昨日（3日）上載9條預告片段，分別為8名成員嘅短片及1條被模糊處理嘅合體片段，預告1周年新歌《The Bright Side》將於1月12日推出；短片中僅得So Ching及Ivy So見到全貌，其他成員只見到眼睛部份。大批網民都於影片下留言表示期待：「期待新歌，剩係音樂都已經好好聽」、「每個shot都影得好靚，好有感覺」、「8-1=0，終於等到你哋返黎」、「一定loop爆MV，Collar加油」、「我等咗你哋好耐喇！」。另外，8位成員嘅影片都分別有各自嘅支持者留言，不過So Ching嘅影片於發布短短2小時內已獲5.9萬個讚好，比其他成員足足多幾倍，網民都紛紛留言表示支持So Ching每個決定，希望佢能夠加油：「我地會一路喺度陪伴你」、「好感動見到你咁堅強，你要加油，好多人都好愛你」、「美麗、勇敢的女孩」、「蘇芷晴世一」、「一個好女仔」及「唔想叫你加油，因為妳已經好努力面對一切！」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！