COLLAR捲涉抄風波? MV場景竟與《百萬富翁》廠景非常似
ViuTV選秀真人騷《全民造星IV》打造嘅8人女子組合「COLLAR」喺前日(12日)正式出道,成員包括Marf(邱彥筒)、Gao(沈貞巧)、Day(許軼)、Ivy So(蘇雅琳)、So Ching(蘇芷晴)、李芯駖、WINKA(陳泳伽)及Candy(王家晴),而COLLAR出道歌《Call My Name!》及MV亦已經推出,人氣席捲全城。不過COLLAR出道兩日就捲涉抄風波,被網民指佢哋嘅新歌、MV及概念照都甚有韓團嘅影子,而MV嘅其中一個場景仲同ATV經典遊戲節目《百萬富翁》嘅廠景非常似。
COLLAR出道歌《Call My Name!》MV喺噚晚(12日)正式面世,8位成員齊齊化身新世紀人類戰士,型爆登場,當中以Ivy So 最為搶鏡,唔少網民都俾佢吸引到。網民除咗留意成員造型之外,當然亦有留意MV概念及場景,不過就被網民指有抄襲嘅嫌疑,例如大廈牆身出現人像與韓團aespa嘅《Savage》MV相似、跳舞場景設計與ATV經典遊戲節目《百萬富翁》廠景相似。
除咗MV之外,網民仲話COLLAR有多處有疑似抄襲。第一,COLLAR造型照亦被指與EXO《Love Shot》概念照相似,原因係兩者都以橙紅色作為背景及類似嘅拍攝角度;第二《Call My Name!》嘅歌曲封面亦被指與NCT 2020嘅專輯《RESONANCE》相似,因為佢哋都係用上紅色背景,再加上成員們嘅剪影;第三《Call My Name!》洗腦位與AKB 48《River》相似,所以有網民認為旋律及洗腦歌詞相似。唔知大家又覺得似唔似呢?
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!