Di-Dar音樂劇場｜尾場謝幕台上台下玩到癲 葛民輝難忘瞓棺材嚇親家人 何洛瑤不捨團隊落淚

由風車草劇團主辦，風車草黑心喜劇《Di-Dar音樂劇場》，一連34場的演出，於昨晚假香港演藝學院歌劇院上演尾場演出。由於是最後一場的演出，劇團主腦梁祖堯、湯駿業（AhDee）、邵美君、與其他演員葛民輝、岑珈其、何洛瑤（Sica）、梁浩邦、阮韻珊、鄧家杰（KaKit）、杜曦駿（Larry），以及一眾台前幕後工作人員都情緒高漲，在謝幕時齊齊玩到癲，興之所致，更罕有地encore劇中的歌舞場面，將全場氣氛推至最高點。

由於颱風摩羯襲港，《Di-Dar》尾場演出延至昨晚舉行。劇中爆笑場面不斷，當中的跳唱組合R.I.P載歌載舞精彩場面，更贏盡全場掌聲與歡呼聲，所以昨晚謝幕時，一眾演員罕有地encore〈火熱動感La La La〉，以答謝觀眾的寵愛，而有些觀眾亦有備而來，自備R.I.P燈牌應援，令現場瞬間變成了演唱會現場一樣，玩得興起，阿葛更走到台下與觀眾打成一片，而Sica對舞台依依不捨，更一度落淚。

謝幕時，阿祖特別感謝阿葛，說：「以前聽軟硬天師嘅時候，點會諗到第時有一日會同佢同台！永遠感激你，喺呢個旅程入面俾我哋嘅所有嘢。」阿葛聽到即表示：「其實我係後輩，呢啲先係前輩。其實我要感謝風車草，因為佢哋搵咗好多新演員，好多未掂過台板，我都只係第二次踩台板，嚴格嚟講我都係後輩嘅一部份。阿祖搵咗我之後，真係大開眼界，今（昨）晚呢場係痴線㗎！令我感受到風車草嘅劇迷，原來係咁痴線㗎！」

事後，阿葛分享這次難忘場口，必數瞓棺材一幕，他說：「農曆七月要瞓棺材，嚇親我啲屋企人。成件事好虛幻，但有傑叔（法科顧問）頂住，加上我平生不作虧心事，所以冇有怕！」在劇中扮演鬼魂的珈其，對於在農曆七月要演出這角色，他揚言未驚過，他說：「我哋入場有做足拜四角，人人都有護身符，我嗰道符仲要係加料勁啲嘅，所以就算七月十四嗰晚要演出都唔驚！而且投入演出，要記住台詞、歌詞、舞步，都冇理咁多喇！」至於在台上落淚的Sica，她解釋原因道：「其實每晚都好感動，但嚟到最後一場，諗到第二日唔會再見大家，就好唔捨得，所以好湧動。」

今次《Di-Dar》獲得空前成功，監製兼導演AhDee表示：「冇諗過反應咁瘋狂，好多觀眾想R.I.P出道，所以我哋都講笑咁講，不如真係籌備R.I.P出道。」反應如此熱烈，AhDee表示跟團隊都考慮重演，他道：「我哋搵緊機會重演，因為好多觀眾都未睇，淨係waiting list都可以開多兩星期，所以真係好希望有機會演多次，等多啲觀眾可以入場一齊笑一齊感動。」