Do姐鄭裕玲細佬鄭裕德 神隱43年現身 當年拍電影有一個遺憾終圓願

香港電影資料館早前舉行「影以載道——銀都作品回顧」活動，挑選銀都機構多套作品放映，而開幕電影《父子情》更以4K數碼修復版放映。大會邀請到片中飾演主角一家母親嘅資深演員朱虹出席開幕活動之外，更請到男主角鄭裕德Peter專程回港參與。

鄭裕德係著名主持Do姐鄭裕玲細佬，1981年拍完《父子情》就離港升學，43年來未有再參與電影製作亦鮮有現身。片中鄭裕德演「父子情」之中嘅囝囝青年版，當年文質彬彬嘅Peter演熱愛電影嘅青年，而家佢蓄一頭花白長髮紮髻，仍然甚有藝術家風格。

活動上朱虹同鄭裕德依然情同母子，鄭裕德仲叫朱虹姐「媽咪」。Peter話能夠睇返《父子情》有好深感受，因為當年拍完《父子情》佢就離開香港去外國留學，始終冇機會喺大銀幕睇返套電影，事隔四十幾年佢終於可以睇到，而且係4K修復版，所以覺得好特別。鄭裕德憶述拍攝時天氣好似而家咁熱，但拍完之後好滿足，係一個好特別嘅經歷。

《父子情》係八十年代香港新浪潮導演方育平首部作品，故事描述一個草根家庭嘅父子關係，由兒子童年講到長大成人。《父子情》榮獲第一屆香港電影金像獎最佳電影及最佳導演獎項。當時喺片頭播放嘅演員表中，鄭裕德以「鄭裕柯」一名出現。片中鄭裕德家姐將升學機會留俾細佬，而現實中成長於單親家庭嘅Do姐，本來想去美國留學讀新聞系做主播，但即使會考英文有A，同樣決定放棄升學，將機會留俾細佬。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！