Edan@MIRROR後援會風波｜Admins疑鬧爵屎「白卡」 黑箱作業操控演唱會抽飛結果

【22:45更新報道：admin團隊宣布解散】

MIRROR又有成員後援會起風波！繼早前Alton@MIRROR後援會突然宣布解散後，今日Edan@MIRROR後援會亦出事，有自稱EFC總務部leader爆料，指對EFC的admin行為看不過眼，過份行為包括稱爵屎（Edan粉絲稱呼）為「白卡」、設黑名單「白卡名單」讓他們不會抽中演唱會門票、不尊重Edan的決定，及自肥拍Edan MV等等。一眾粉絲紛紛表達不滿，更發起「#adminleaders請解散」、「#adminleaders請向呂爵安及爵屎道歉」等要求。

今日自稱EFC總務部leader的Kiwi爆料，表示自己已辭任職務：「我要喺度首先對大家致歉。公開EFC管理層內部對話，我知道自己咁做法係非常唔啱！但自己真係過唔到自己果關。」首先Kiwi指，EFC的admin會稱呼爵屎為「白卡」：「邊個爵屎係谷或外面谷話過EFC，其實都會記落白卡名單。」而只要是名單中的人物，都不會抽中演唱會門票：「抽中左都會起出黎或比西位佢。」並附上admin們的對話截圖，圖中見到admin們一同取笑與攻擊所謂白卡的爵屎。

此外，亦有粉絲指EFC的admin不尊重Edan的決定，Edan曾親自回覆USA EFC批准相片用作應援，但香港的EFC就不滿Edan回覆USA EFC。另外，EFC admin亦被指刻意讓某些非官方應援團體，無法於Edan個人演唱會參與應援。亦有人指出，有leader以權謀私，自肥拍Edan MV。對於以上種種指控，大部份爵屎都表達不滿，於TG group正蘊釀要拉現任admins下台。

至同日晚上 10 時許，EFC正式在 telegram 群組宣布，admin 團隊會於完成交接後解散，並交代後續活動安排。Admin 團隊亦邀請有意接任者組成團隊，並於 10 月 23 日晚上 11 時 59 分前與他們聯絡。消息指，Admin 團隊特別向 Edan 致歉，但就未有向其他爵屎致歉。