FI專欄|踩完誠哥 記者仲完完整整成個人係度|Louise

FI專欄|踩完誠哥 記者仲完完整整成個人係度|Louise
FI專欄|踩完誠哥 記者仲完完整整成個人係度|Louise

收到前上司一個Whatspp,分享黃子華感謝李嘉誠的大方報導,子華說他不停在棟篤笑表演上笑誠哥,而到今日都冇事,自己仲完完整整成個人係度咁話,並公開感謝誠哥的大方。這位帶我入行的前上司寫下:「非常同意子華」。昔日,我們的文章對誠哥特別有批判性,直啲講就係「踩」喇,但做記者的都冇事。新香港之下,如此大方又有公關手腕之大孖沙,還有嗎?讀者別介意,在此分享昔日採訪誠哥的過癮經歷,緬懷一下過去。

邀請李嘉誠專訪

記得2000年,收到上司柯打,要籌備《千禧名人錄》並以李嘉誠打頭陣,要負責邀請李嘉誠做專訪。心想:「玩我咩?咁多牙齒印!專訪?誠哥睬我?」但總要抱一絲希望的,為表誠意,起草了一封邀請信,老父手字了得,遂請槍由他抄寫一次,送到長實公關部搏一搏,當然石沉大海。

一把兩傘的啟示

上司再著我,每天早上五點半左右,到深水灣哥爾夫球會門口等誠哥,希望每日問一句,都有些料寫下,但誠哥只是揮手表明說:「我唔會接受訪問。」仲有一堆說話,意思大概係我唔like你老細,但唔喺唔like你記者,明白我哋都只不過係打工仔。

等咗幾日,都唔睬我。心想再等都係食白果,索性帶埋條毛巾、泳衣,收隊後去深水灣游個水先返公司cheer up下自己。點知誠哥架車駛出來時就落大雨,唯有用條毛巾遮住個頭,誠哥見狀竟然停車,送上一把雨傘,一個記者仔獲首富雨中送傘,真係講足幾廿年都要講。但心諗點解唔叫我坐埋順風車,可以問兩句都好吖!篤住把遮返報館有鬼用咩?

男記者傾慕誠哥

返回報社後,當時有位資深嘅地產版男記者向這把傘投以艷羨眼光,因為他對誠哥傾慕至極,真心地處處維護他心目中的Superman Li,年青時不明此君何解如此盲目,當正誠哥係偶像。如今再想,也不錯,生命中有一位偶像從沒令他失望,好比One Life One Love。

誠哥唔啋,惟有返佢鄉下潮州市挖料。當年跟我一起出差的攝影師,剛從外地返港,農曆年相聚之時談起仍十分興奮,仿如昨日。記得在潮州市處處「食白果」時,遂踎去路邊茶檔嘆杯潮州茶,與老闆閒談之際就「有料到」,得知誠哥仲有個姨媽在附近,立即踩去採訪,仲有誠哥鄉里指路上山頭,連李氏祖墳都拍照起底。

查問之後一笑置之

廿多年前,數碼港批予李澤楷引起地產界爭議,在和黃記者會上非常哄動,中外記者齊集,當時挑機問誠哥:「係咪只有Richard先至識得搞呢啲高科技…數碼港呢?」誠哥面有不悅,但只問:「你邊間報館記者?」回答後,他就冷笑幾聲「呵..呵..」再指着同系報紙記者說:「怪唔之得,你哋同一口徑嘅。」 出版的文章當然辛辣,但記者沒事也沒什麼後果,像子華所說,記者仲完完整整成個人係度。

註:專欄作者的觀點不代表本網立場。

Fortune Insight 聯乘 《華爾街日報》推出全新訂閱計劃「FI Prime Plus」,只需WSJ官網原價三分一價錢,即可同時暢讀《華爾街日報》全網內容和Fortune Insight大部份收費內容
按此訂閱:https://prime.fortuneinsight.com/web/wsj

Subscribe FORTUNE INSIGHT Telegram: 
http://bit.ly/2M63TRO

Subscribe FORTUNE INSIGHT YouTube channel:
http://bit.ly/2FgJTen