Frankie@MIRROR長衫Look稱旗袍被「皮寶寶」笑 皇帝裝被指「靚仔但冇霸氣」

男團MIRROR明年一月將舉行演唱會，成員Frankie陳瑞輝（皮皮）就藉空檔去咗轉台灣，仲喺IG分享多張古裝造型照，一班皮寶寶留言大讚員Frankie靚仔有型；不過Frankie就非常搞笑地Hashtag咗自己著旗袍。

Frankie著上唐裝並到台北舊式街道打卡，相當Chok！帖文下嘅每個留言都激讚Frankie著得好睇：「嘩嘩，皮皮去到邊個年代都一樣咁靚仔喎」、「想知有咩衫你著係唔好睇？」、「少爺，你好帥呀」、「皮少爺有型」、「咩年代都係咁有氣質咁靚仔」，但都有心水清皮寶寶見到Frankie Hashtag咗旗袍而取笑佢：「皮皮，唔係女仔著嗰啲先叫旗袍，男仔嗰啲叫長衫咩？」、「旗袍係女裝，男裝好似叫大掛/長衫啊～」「皮你嗰件唔係叫唐裝咩？」「主子靚靚，不過呢件唔係旗袍啊」等等。

隨後，Frankie又於IG Story分享穿上黃袍扮皇帝嘅照片，並寫道：「睇吓皮寶寶講咩先，呢個應該就係正宗古代mon post方法。」，有網民大讚Frankie成個《九五至尊》飾演雍正嘅江華咁靚仔，但都有部分網民表示唔同意，直言唔夠霸氣，反問大家係咪唔知邊個係江華：「邊到似江華，人哋行出嚟氣勢動作都好有皇帝架子，呢條友感覺只係cosplay」、「靚仔係靚仔，但冇霸氣」、「邊忽似？盲？」、「睇聖旨睇到好似睇iPad咁」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！