雅虎香港新聞 《I Swim》靚仔肌肉大放題！Edan小諧星變嚴肅隊長、Jeffery網民讚演技自然（附劇中10大肌肉泳將逐個睇）
一年容易又夏天，除咗為大地帶來美腿，今年仲有壯男肌肉睇！千呼萬喚 ViuTV 新劇《I SWIM》終於開播，大家應該喺宣傳照同廣告影片見到海量青春鬥水畫面，但相信大家焦點都係10位男神嘅健壯肌肉，實在係年輕就是力量，首兩集率先跑出嘅就係演技自由、顏＋肌值滿分嘅Jeffery，同埋估佢唔到由小諧星變嚴肅認真隊長嘅Edan，齊齊嚟下咁多位男角色嘅簡介（肌肉）入門！
【立即睇】Yahoo Style 專頁，跟貼最新潮流及優惠情報
《I SWIM》泳將1）呂爵安 Edan 飾演 李馬榮
港產男團MIRROR 一向「惜肉如金」，炎夏30幾度都會著大褸，近年開始大解放，其中一個瘋狂「露肉」嘅就係呂爵安 Edan！Edan 劇內飾演啟賢中學泳隊隊長李馬榮，為求嬴宿敵黃亞樂（邱士縉飾）刻苦訓練又希望組成夢幻泳隊，因性格認真嚴肅而被視為Edan尋求突破之作，但暫時咬字問題仍備受爭議，唔知大家又收唔收貨？
而肌肉排名方面，從前從未認真健身、瘦底又不熟水性嘅Edan，可以話係出盡力掙扎，除咗努力操水外，亦都有飲蛋白粉、採用低碳高蛋白飲食餐單，戒口戒得非常徹底，二頭肌、三頭肌、腹肌都若隱若現，先天不足而後天補救，誠意十足，但比起同劇「筋肉人」嚟講，尚未算非常突出！
《I SWIM》泳將2）魏浚笙 Jeffrey 飾演 余浪沖
Jeffrey自《調教你男友》起爆紅，今次係佢首次出演電視劇，飾演轉校生余浪沖並加入泳隊發展天才游泳天賦，由於性格討喜、演技自然，靚仔外表但性格賴皮反差萌極為可愛，一開場已經非常搶戲被睇高一線，暫時係最受歡迎嘅型男角色！
Jeffrey肌肉非常有睇頭，花半年時間操肌，可見肌肉非常厚實，曾經小學時係肥仔嘅Jeffrey，麒麟臂、六舊腹肌、飽滿胸肌應有盡有，拍劇前仲專登剃胸毛，令人賞心悅目！後生、靚仔、性格好、夠勤力，Package完美愈做愈有，相信就係《I Swim》嘅爆紅第一人。
《I SWIM》泳將3）邱士縉 Stanley 飾演 黃亞樂
Stanley 飾演中學明星運動健將，任何運動亦係獎牌常客，而且係A班游泳隊隊長，李馬榮嘅終極宿敵。Stanley拍攝前並非精通泳術，用一個月時間學識游泳四式，但演技同樣自然完全無違和感！
肌肉排名嚟講，大表哥一定係世一！為更貼近中學角色，Stanley刻意減肌令角色睇落更年輕，但超強大手臂、勁厚實胸肌、非常完整嘅六舊腹肌，加上腿部肌肉亦修長而健實，望落就超完美嘅鋼條身型，真係希望佢全套劇都唔好著衫！
《I SWIM》泳將4）王智德 Alton 飾演 羅力森
Alton 飾演努力追趕黃亞樂、李馬榮嘅A班泳手，極努力但就差啲天賦，而經常飲恨只得第三名，不過開播後，角色未有太大發揮，令人好奇後續發展。
肌肉嚟講德仔都數一數二，曾任體適能教練嘅Alton，今次亦為角色減肌，但同樣胸肌大大舊、六舊腹肌非常明顯，但減磅後明顯面型比較瘦削，Alton都有講佢肥少少飽滿上鏡會比較好睇，所以肌肉大鬥法中，都係大表哥略勝！
《I SWIM》泳將5）吳啟洋 Phoebus 飾演 關雲長
Phoebus 飾演乖巧忠心嘅班長關雲長，係C班嘅接力隊元祖成員之一，鄰家男孩靚仔外表，加上一板一眼嘅乖巧形象，同樣非常受到注目。現實中曾經係運動員嘅Phoebus，同樣係性格認真而低調怕醜，肌肉方面亦係比較「沉穩」若穩若現，但睇得出有努力掙扎，期待佢有更多突破！
《I SWIM》泳將6） 王智騫 Martin 飾演 程子帆
大家對王智騫可能有少少陌生，王智騫有「翻版柯震東」稱號，飾演C班泳隊成員程子帆，性格同樣溫柔低調，作為班中「智商擔當」人肉資料庫，穩妥而被受信任！
肌肉方面相信大家見到劇照都會對佢留有深刻印象，身型未算非常厚實，但肌肉線條突出而睇得出落過一番功夫。原來24歲嘅佢本來都係瘦底、少運動，專登為咗劇集而操肌成為肌肉男，仲堅持一星期操三至四日，奉行少糖少油低卡高蛋白飲食，由初開始體力麻麻哋，練到有咁嘅成績，絕對非常認真！
《I SWIM》泳將7）葉振弘 Marco 飾演 楊仕福
Marco 飾演 A班泳隊較弱嘅一位隊員，亦係C班集中攻擊嘅目標，但作為A班泳將，當然都係肌肉擔當！劇照發佈後，好多人都話Marco童顏但深藏不露，腹肌線條非常明顯，唯獨胸肌可以加強改善，節食加勤力操肌絕對係「童顏巨肌」反差強勁，絕對係肌肉決鬥前段班！
《I SWIM》泳將8）歐鎮灝 George 飾演何大秋
George飾演C班愛情專家兼接力泳隊成員，主力追女仔而學業、泳術作為次要嘅佢，性格懶散而賴皮，暫時表現都算亮眼，期待佢有更多劇情發展，由懶散男進步為泳隊擔當！
一向係P13XL嘅「肌肉擔當」（誤），George一如劇中飾演放飛角色，瘦削零肌肉，睇頭不大但大家都非常期望佢嘅「追女仔」宇宙大爆發！
《I SWIM》泳將9) 陳毅燊 Ansonbean 飾演 章浩
Ansonbean 仍未出場，而人物簡介亦指佢係特別演出，飾演泳壇明日之星，令人非常期待。Ansonbean一向係爆發型肌肉擔當，實淨而無得輸嘅肌肉線條，加上古銅色肌膚，同樣係令人賞心悅目嘅肌肉男！
《I SWIM》泳將10）江卓科 Ian 飾演 趙威
江卓科 Ian 係首次登場嘅新人，屬於A班精英運動員之一，而現實中嘅佢都係一名游泳健將，暫時就未見到佢爆肌登場，但IG相可見8舊腹肌同樣明確，亦屬可口嘅青春大隻仔，實力絕對不容忽視！
>>按此下載<<全新Yahoo APP，睇盡衣、食、住、行，全方位最新網購情報，購物資訊盡掌握，立即下載！
緊貼潮流、購物資訊，就Click入以下連結睇更多啦～
🎉📱Style Facebook：https://www.facebook.com/YahooStyleHK/
🎉📱最新優惠碼/網購攻略：https://hk.news.yahoo.com/topic/hkshopping
潮流熱話：
MIRROR演唱會騷前大搞BABY MIRROR展覽！鏡粉銅鑼灣瘋狂影相＋限定店獨家入手12子公仔迷你粒粒樽
