J2邀請做節目嘉賓 素海霖落閘︰我唔上TVB的

2023年可以話係素海霖（繪麗奈）大爆發一年，由youtuber轉型成為首位港產日本AV女優，一年出6套作品，仲打入amazon銷量榜三甲。除咗AV演出之外，素海霖仲參與過音樂節演出、搞fans見面會等，機會處處。

素海霖尋日喺IG post咗一張電話截圖，有自稱係TVB J2頻道嘅幕後人員透過通訊軟件搵素海霖，並表示籌備緊一個新節目，想邀請佢做嘉賓，希望通個電話傾一傾。素海霖之後回覆對方「唔知你喺邊度拎我電話，另外我不上TVB的，多謝邀請」。素海霖另外寫道「真的很不喜歡無啦啦有人比（畀）我電話人」、「正常嚟講 唔係應該問咗當事人介唔介意畀電話其他人先嘅咩」，又建議如果真係想聯絡佢，其實可以透過IG聯絡，佢係會回覆嘅。

素海霖之後回應網媒時解釋拒絕上TVB嘅原因，認為大台唔係咁啱佢風格，又講笑話自己比較直腸直肚，驚唔小心講錯嘢會畀人喺塊面打格仔，暗寸緊TVB喺內地微博將自家視后李佳芯個樣「馬賽克」。

查實素海霖之前都出席過ViuTV嘅《晚吹－讓我一次買到夠》及杜汶澤主理網台喱騷嘅TO DO LIST節目，甚至未拍AV前已經成為《晚吹－戀講嘢》自爆前男友曾瘋狂偷食，自己於是報復式出軌，結果被前男友用刀整傷要入院縫針。講嘢夠爆，難怪大台想搵，不過冇機會lu。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！