Jeffrey魏浚笙北上宣傳《飯戲攻心2》 高顏值獲內地網民讚：呢啲先配做頂流

港產賀歲喜劇《飯戲攻心2》（內地譯名《還是覺得你最好2》），雖然續集冇「子華神」黃子華坐鎮，不過票房走勢依然凌厲。日前導演及一班劇中演員現身內地為電影進行宣傳，當內地網民見到魏浚笙 (Jeffrey) 後，佢哋就喺社交網站大讚Jeffrey顏值高，仲話佢先配做香港嘅頂流。

25歲嘅魏浚笙，本身擔任模特兒工作，與女友Evelyn於2020年參演ViuTV真人騷《調教你男友》人氣急升，及後成為廣告界新寵兒，吸金力驚人。之後，Jeffrey又加入遊戲真人騷《膠戰》成為「6膠」成員之一，並開始喺劇集及電影見到佢嘅蹤影，幕前曝光機會愈來愈多。去到上年，Jeffrey加入樂壇成為2023年樂壇男新人，先後推出歌曲《第一個迷》及《失約巴黎》，向歌影視三棲發展，而女友Evelyn就成為佢嘅經理人幫忙處理大小事務。

而魏浚笙有份參演嘅電影《飯戲攻心2》（內地譯名《還是覺得你最好2》），將於元宵節喺內地上映，所以佢亦有前往廣州為電影出席宣傳活動。Jeffrey深受當地人歡迎，除咗為佢哋簽名之外，仲同粉絲自拍，全程都非常親民。其後內地網民喺社交網站大讚Jeffrey顏值高，例如「他比現在很多年青男團正常好多」、「以外形來說，近年hk新人最好係佢」、「呢啲先配做頂流㗎嘛！！」及「好靚仔啊」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！