JPEX︳莊思敏連環投資失利變「商界燈神」 經理人公司 化妝學校 點心店 的士牌 買樓 全蝕！

虛擬幣平台JPEX被證監指無牌經營之後，警方本周初拘捕6男2女指佢地涉嫌詐騙，被捕者包括林作同KOL陳怡（陳穎怡）。曾經為JPEX做代言人嘅張智霖去到警察總部協助調查，而日前身在大馬嘅莊思敏（Jacquelin），由於曾經拍片宣傳該平台而捲入風波，尋晚佢回港後亦主動聯絡警方助查。JPEX事件爆出後，莊思敏曾表示自己都係受害人，損失6位數。對於一度被指要「引渡返港」，Jacquelin以「清者自清」回應。

莊思敏父親係已故拿督，外界盛傳莊家資產數以億元計。雖然家底厚，但莊思敏多年來努力投資增值，仲拍片教人搵錢，不過唔係次次扑中。由多年前搞經理人公司、化妝學校到後來涉足開點心店、投的士牌，統統瀨嘢。不過唔緊要，失敗乃成功之母！

入行幾年，莊思敏已經有搞生意，開經理人公司同化妝學校，但到2014年底，莊思敏向外界透露2項生意都因為經濟環境而要結束，仲話損失咗7位數字添。2015年莊思敏又搞生意，同朋友夾份開點心店，當時苟芸慧據報自稱都有投資，但莊就話苟姑娘唔喺股東名單上，又話冇喺鋪頭見過對方。嗰時有傳莊思敏同苟芸慧因此不和，甚至話大打出手！但係雙方喺微博互相留言淡化事件，今年初莊思敏同苟芸慧更同場出席gathering，相信冇事喇。至於點心店，2019年莊思敏聲稱因為社會運動，3個月勁蝕150萬，因此要轉手。

香港人最叻嘅投資方式炒樓，莊思敏一樣涉足。佢2017年以627萬買入何文田加多利軒一個中層263平方呎單位，但同類高層單位早前以約590萬元成交，賬面計莊思敏個單位至少輸緊37萬。而加多利軒由於近期多數成交賣家都係損手離場，因此被稱為「蝕讓之城」。

至於今年6月時，莊思敏以400萬元向歌手AGA（江海迦）未婚夫鄭子邦（的士邦）購入的士牌，當時佢計過條數話「的士牌門檻低回報高，5厘回報好過買樓」。不過今年的士牌價下跌，8月時更低見358萬，到近排先上返少少，但仍需努力先返到「家鄉」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！