LOONG 9成員均有外號 冼靖峰叫「妙音龍子」出道即上央視晚會 疑似中文團名流出？

TVB偶像選秀節目《亞洲超星團》賽果早前出爐，頭9名選手奧利、李權哲、冼靖峰、江信熹、梁詩煜、白子奕、文佐匡、黃奕斌及陳梁順利組成全新團體「LOONG 9」出道，不過團名公佈後並引起網民譏笑及激烈討論。LOONG 9出道不足兩周，已經成為網上熱話，唔少網民都表示好好奇佢哋將會有啲咩搞作。日前佢哋就拍攝咗個人照，並喺官方微博上公開，佢哋仲大爆每個人都人一個外號！另外，今日（18日）亦都有報道指佢哋會首次出演央視晚會舞台，更流出佢哋嘅中文團名！

LOONG 9官方微博日前公佈成員們嘅個人照，各人造型都以黑色作為主調，身後配上一大個紅色嘅組合標誌，雖然唔少網民留言大讚有型並期待佢哋嘅動向，不過亦有網民認為呢個官方個人照充滿江湖味。除咗官方個人照之外，原來佢哋仲擁有自己嘅外號，分別係冠軍奧利叫「馬卡龍」、亞軍李權哲叫「霸王龍」、季軍冼靖峰叫「妙音龍子」、江信熹叫「波塞東龍」、梁詩煜叫「梁龍」、白子奕叫「小白龍」、文佐匡叫「迅猛龍」、黃奕斌叫「翼龍」及陳梁叫「溫柔小金龍」。

成員外號曝光後，再一次引起網民激烈討論，認為外號騎呢兼趣味十足，例如「呢隊奶龍攪笑方面，真係好勁」、「橫掂都冇人識，改啲奇怪名冇所謂啦」、「妙音龍子????係日本名定法號????」、「原來行騎呢路線」、「首先自己唔尷尬，尷尬就係人哋」、「咁似出家人法號」、「乜料呀」、「12 隻恐龍去野餐」、「可以代言Monster Hunter」、「尷尬到」、「好似10兄弟啲名咁」、「贏咗比賽贏到好似輸咗咁」、「點解唔改名做侏羅紀公園」、「不如叫埋小火龍 噴火龍」、「我以為pokemon名」及「隊名已經夠娘 隊員綽號仲娘」等等。

另外，除咗成員外號，今日有報道指LOONG 9嚟緊會以央視晚會作為佢哋成團後首個舞台演出，同一眾內地紅星同台，更透露佢哋將會以「玖瓏少年」作為中文團名！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！