MIRROR四子Lokman／Tiger／ Alton／Frankie齊出SOLO 明日中午《叱咤樂壇》首播

人氣男團MIRROR再有成員推出派台歌，今次唔係一位，而係四位一次過一齊出solo歌。隊長Lokman（楊樂文）、Alton（王智德）、Tiger（邱傲然）及「皮皮」Frankie（陳瑞輝）將會喺聽日（5日）推出solo，中午12點喺商業電台 903《叱咤樂壇》首播，再喺各大音樂平台上架。四人新歌成功趕及喺MIRROR演唱會舉行前推出，相信唔少粉絲都好興奮。

《叱咤樂壇》主持人謝茜嘉今日公佈消息，指Lokman、Alton、Tiger及皮皮嘅solo歌曲將會派台。Lokman早前已經先後與Anson Kong合作推出《虎道門》及《Fight Your Corner》，而佢早前亦透露今次自己有份參與填詞，並指solo長達15分半鐘。而Alton方面，佢亦同樣曾與Anson Kong合作《Rebound》，之後亦有為節目《勁騎26》推出《道路使用者的有型守則》，不過作品就未有派台。另外，佢喺個人影片頻道仲有兩首歌曲，分別係為《生化危機4》而寫嘅主題曲及上年農曆新年推出嘅《拜春 BAAI3 CEON1》。

未曾出過solo嘅Tiger，早前有報道指走懷舊感動風嘅新歌，係同前ONEPROMISE成員天衡及bass手Sora合作。至於皮皮方面，佢都同樣未出過solo，其實佢喺上年已經透露想出solo，不過就未決定歌曲風格，仲話有諗過搵Ian（陳卓賢）合作，唔知新歌係唔係真係搵咗Ian製作呢？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！