MIRROR成員被內地網民攻擊顏值低：當明星門檻這麼低嗎

男團MIRROR出道兩年多人氣一直居高不下，掀起香港久違嘅追星熱潮，3歲去到80歲嘅觀眾都成為「​鏡粉」，可以話係總有一個鏡粉喺左近。佢哋除咗活躍於歌影視三界之外，更頻頻出席品牌活動及拍廣告，深得廣告商及粉絲支持及愛戴。

早前MIRROR有份主演嘅劇集分別喺美國及日本播出，而MIRROR成員Anson Lo、Ian、Edan和姜濤嘅海外粉絲亦有為偶像應援。人紅自然事非多，近日MIRROR喺內地開始引起關注，有微博帖文指出佢哋為「香港目前爆火的男子组合」，及寫上「為什麼成員顏值都是我get不到的！」 。而一班內地網民睇完呢張MIRROR成員睇落未準備好影相嘅照片後，紛紛留言攻擊MIRROR成員顏值低，例如「怎麼能這麼醜 根本看不出來哪個是巨C的程度」、「像一群00年代的洗髮郎」、「當愛豆（Idol）門檻這麼低嗎」、「這輪廓崎嶇的程度」、「他們的顏值 是走在路上我都不會多看一眼的程度」、「這個顏值？？？真的是愛豆嗎 為什麼那麼火 我不理解」、「其實還好不是嗎？内地的男團不也這個水平......」及「現在的港男含醜量好高」等等。另外，亦有內地網民更提及喺香港西式快餐店及唔少平面廣告及電視台廣告都見到MIRROR蹤影，而且商場嘅人形牌真係上到70歲下至10歲嘅人都被吸引到要影合照，稱MIRROR真係無處不在。

雖然唔少內地網民狂踩MIRROR，不過亦有人因《大叔的愛》而被圈粉，仲話「教主」Anson Lo係團隊裡面的「TOP」，兼列出Anson Lo所代言過嘅廣告及品牌。

而一班香港網民當然唔認同內地網民嘅講法，喺討論區直指內地男團嘅質素同MIRROR不相伯仲，話佢哋「五十步笑一百步」，更有網民搞笑留言話「人地品味係的士陳同蛇精男」，力指香港及內地嘅審美觀不一樣。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！