MIRROR演唱會補場有期 鏡粉各有期望「想佢地有多啲時間預備」

MIRROR去年嘅紅館演唱會，由於第4場發生屏幕墮下事故，演唱會隨即腰斬取消。尋日主辦單位Makerville宣布將於明年一月轉到亞洲國際博覽館Arena，補回餘下場數。

消息一出，唔少鏡粉都喺群組討論。由於場地唔同咗，佢哋都想知道位置安排，尤其是之前買到靚位飛嘅一群。亦有fans希望可以買返上次個唱推出嘅周邊產品，但有人聲稱去年尾Makerville內部已經將紀念品「散貨」，唔知仲有冇。

因為係下年一月開show，雖然未知日子，但有機會撞正係成員Edan（呂爵安）生日正日，因此有「爵屎」希望可以同Edan同場慶祝生日。

有fans感性地留言，上次係睇出事嗰場，到而家銀包都keep住張飛，等MIRROR準備好再出發，又覺得補完場「會好似round up自己情緒，個心會釋懷」。對上一次紅館show出事前，唔少報導都話MIRROR成員冇時間行熟個舞台，機關重重令險象環生，因此有fans最希望希望MIRROR今次可以有多啲時間預備，最緊要安全。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！