雅虎香港新聞 MIRROR演唱會｜12子首踏紅館連開12場！鏡粉騷前Loop歌清單準備一齊跳舞
MIRROR演唱會飛一票難求，無論你公售買唔買到MIRROR飛都好，身為鏡粉都可以一直播住MIRROR歌單，支持偶像！編輯特別準備咗high爆唱跳歌單，大家背定歌詞、練定舞，今年暑假同12子一齊跳舞！
【立即睇】Yahoo Style 專頁，跟貼最新潮流及優惠情報！
香港男團MIRROR演唱會，暫定7月25至31日及8月2至6日連開12場演唱會，今早（31號）進行公售。今次賣票以實名制，每人限買2張，公售總共開賣37,700張，實在難搶啊～但無論你搶唔搶到MIRROR飛，都可以不停Loop MIRROR歌單支持偶像，不要灰心，大家聽住歌一齊跳舞！
MIRROR唱跳舞曲1）2022全新唱跳力作！《Innerspace》
受疫情影響而等到鏡粉頸都長嘅團歌終於登場！2022年第一首團歌，由《Megahit》作曲班底再度打造強大節奏舞曲，加上小克別具創意嘅歌詞，由MIRROR勁歌熱舞帶大家了解內在奧秘，聆聽身體聲音好好認識自己！亮點包括有姜濤首試英文說唱、由教主Anson Lo親自填寫說唱歌詞，加上節奏明快、「動作好忙」、令人百看不厭嘅「水舞」，各位鏡粉一定要好好背歌詞，到時一齊跳舞！
MIRROR唱跳舞曲2）三周年紀念團歌！《All in One》
MIRROR每年都會推出周年紀念團歌，而2021年就係宣告「12-1=0」嘅《All in One》！同樣帥氣熱舞加上節奏明快嘅High歌風格，強勁節奏一秒帶起輕快Party氣氛，相信亦都會係演唱會必定出現舞曲之一，各位鏡粉要開始背歌啦！
MIRROR唱跳舞曲3）百老匯風格開心之作！《Boss》
首度嘗試百老匯舞曲風格，《Boss》一曲喺2021年橫掃各大頒獎典禮，「跳到氣咳」嘅極快舞步，加上「唱到咀軟」嘅連密歌詞，當然不能不提可愛MAX嘅百老匯風格MV，各位鏡仔皆有自己角色創意十足，洗腦程度達至發夢都聽到「Baby tonight I do got ya dancing finally～」，相信大家都唔洗背，一埋位已經識跳又識唱！
MIRROR唱跳舞曲4）破舊立新爆紅之作！《Warrior》
姜濤於2020年首度奪得「叱吒我最喜愛的男歌手」後，MIRROR人氣一飛衝天，食住個勢推出《Warrior》，喻意12位神話美少年破舊立新，超級帥氣舞蹈加上美少年造型，由林若寧操刀填詞，令《Warrior》成為2021年最受歡迎歌曲之一，作為鏡粉絕對唔可以唔識！
MIRROR唱跳舞曲5）炎夏火辣秒High之作！《IGNITED》
「焫焫焫焫焫焫著～～」由3歲到80歲都識嘅鏡仔歌，一定必提《IGNITED》！2020年暑假推出，基本上每隔兩日就會喺各大平台聽到，亦都係鏡仔嘅首支爆紅作品～簡單嚟講就係青春肉體加上強勁節奏，帥氣風格搭配洗腦歌詞，一聽就即刻焫著全場，新入坑鏡粉絕對要狂LOOP！
MIRROR唱跳舞曲6）全場大合唱燒滾氣氛！《Reflection》
MIRROR出道一年之作，《Reflection》明快節奏一起，大家就即刻秒速估到係咩歌！有時會掛住MIRROR仔仔出道時青澀表情？誠邀大家一齊睇《Reflection》MV，當中包括「舞王」Jer出道時跳到大叫嘅輕快舞步，仲有12仔年輕舊髮型，「我撐撐撐過了漆黑」，大家都已經有所成長，不論舞藝定歌藝都有進步，成為香港最受歡迎嘅男團之一！
MIRROR唱跳舞曲7）Waste No Time追夢宣言！《ASAP》
MIRROR出道之作，同樣係每次響起前奏都會回憶滿滿，MIRROR出道舞台登場嘅第一首作品，喺早前演唱會發佈會以出道發佈會同樣格局，響起《ASAP》節奏大派洋蔥，各位鏡粉一定好懷念！期待同各位鏡粉一齊喺紅館大叫「Don’t waste no time I’m READY!」！
MIRROR唱跳舞曲8）正副隊長型爆合作！《虎道門》
正副隊長Lokman同Anson Kong嘅最強合作，《虎道門》以暴走族作為靈感，帶嚟「斯文靚仔偶像」嘅另一型仔面貌！正副隊長兩大「跳舞擔當」聯手跳出強勁節拍，令人眼前一亮亦喺各大流行榜有不俗成績，每次一上舞台都氣場全開，全場秒high！
MIRROR唱跳舞曲9）超人氣洗腦No.1之作！《Megahit》
2021年絕對係「教主爆紅年」，除咗《大叔的愛》大紅特紅，食住個勢推出洗腦神作《Megahit》，同樣橫掃各大頒獎禮，亦都係大人細佬一聽到就會自動唱出口嘅舞曲，各位鏡粉、神徙快啲趁仲有時間學埋隻舞，一齊去紅館Uh-Oh Uh-Oh Uh-Oh！
MIRROR唱跳舞曲10）暑假Party High歌風格！《REBOUND》
Bounce with me～～由Anson Kong與Alton聯手製作嘅2022年新作《REBOUND》，超興奮Party風格同樣可以一秒炒熱全場氣氛，洗腦rapping加上開心節奏，就算天氣悶熱、心情差一聽都即刻心情放輕鬆，各位鏡粉快啲聽熟，演唱會同老闆、王勁一齊跳舞！
MIRROR唱跳舞曲11）兒登首度跳唱新作！《Elevator》
Edan經歷2021出道年後，2022年首度推出跳唱作品，主題圍繞面對連環不幸事件時，只要take it easy放輕鬆，問題就可以迎刃而解～兒登「喜劇演員」式唱法，加上由Fatboy梁業編排極易記舞蹈動作，各位鏡粉同爵屎準備好同兒登一齊「elevator～elevator」未呢～
MIRROR唱跳舞曲12）肥姜合體型爆之作！《特務肥姜 2.0》
最後一隻，點少得姜濤同Fatboy梁業用心炮製嘅《特務肥姜 2.0》！靈感源自《全民造星》時最有記憶點嘅《特務肥姜》表演，打造出極易上口嘅明快舞曲，加上姜濤 x Fatboy 帥氣舞步同樣非常洗腦，各位新入坑鏡粉，記住聽熟佢一齊創造世一傳奇！
>>按此下載<<全新Yahoo APP，睇盡衣、食、住、行，全方位最新網購情報，購物資訊盡掌握，立即下載！
緊貼潮流、購物資訊，就Click入以下連結睇更多啦～
🎉📱Style Facebook：https://www.facebook.com/YahooStyleHK/
🎉📱最新優惠碼/網購攻略：https://yahooshopping.myguide.hk/onlineshopping
潮流熱話：
Nike鞋迷去「潮聖」！Nike 50周年展登陸尖沙咀 欣賞極罕Moon Shoe沉浸式回顧品牌經典時刻
