MIRROR要再上一層樓 先要搞掂呢5大隱憂

當只能被稱為「某藝人」嘅藝員話唔認得MIRROR成員會被人瘋狂恥笑，當大台劇都要抽多轉姜濤水，當你嘅IG洗版式出現MIRROR演唱會片段，你會感受到中學課文《花潮》入面所講，「一時之間，幾乎形成一種空氣，甚至是一種壓力，一種誘惑……不得不擠點時間，去湊個熱鬧。」

喺最低氣壓嘅社會環境橫空出世，係最壞的時間亦係最好的時間，MIRROR遇著最差嘅市道，亦創造出自四大天王之後未曾出現過嘅「追（香港）星潮」。假如學Edan喺演唱會所講MIRROR「仲有好多個3年」，有幾項隱憂係要面對︰

北上搵食？

2018年尾出道，撇除社會運動，一隊新晉男團出道第1年都未駛拎回鄉卡上去賺人仔住。之後遇上疫情，除非真係天價，否則未開工就要隔離一頭半個月，對開始多人識嘅MIRROR亦都唔划算。好嘞，疫情終有一日完，北上南下自由來往，人氣又有返咁上下，連葉劉淑儀都向商務及經濟發展局局長邱騰華建議，叫MIRROR參加《天天向上》同《乘風破浪的哥哥》呢啲內地節目，發展大中華巿場。上面出手闊綽，除開12份依然和味，有錢賺唔賺？葉劉講完呢番話之後，fans普遍唔buy，證明北上隨時會冇咁一班鏡粉，但係姜濤講過「香港歌手成為亞洲第一」，咁衝出亞洲係咪要征服埋內地市場呢？冇人想疫情持續，但係諗起呢點，我係高層就寧願「隔離政策」維持一陣。

政府宣傳做唔做？

藝人有社會責任，包括拍政府宣傳片。叫人換身份證或者防止電話騙案梗係冇所謂，之前防疫專家何柏良建議搵姜濤呼籲市民打新冠疫苗，好在姜B堅多job又有個concert可以擋一擋。而且鏡粉普遍年青，而年青人對政府冇咩好感，但係好多天才官員都開始意識到MIRROR多人識而想搵MIRROR「合作」，花姐推得幾多次？

貧富懸殊

我懷疑MIRROR成員之間嘅堅尼系數（貧富懸殊指標）可能高過香港社會現況，姜濤未夠半年就有20個以上廣告出街，Anson Lo個IG呢一個月已經有12個廣告post。另一邊廂亦有隊員有待發力，花姐都講過有成員連去rehearsal嘅搭車錢都唔夠，所以花姐即使唔太享受幕前工作，佢都會出鏡拍廣告，然後將全數收入撥俾「MIRROR ERROR發展基金」，一旦邊個有需要就開庫。憑呢個方式經營，真係只能靠心地好，我亦相信梁祖堯所講12個仔都好愛對方，但係點樣令個個都收入穩定，起碼唔駛花姐「拋個身出嚟」呢？

技藝水平

演唱會當然多人讚好睇，但係歸納部份觀眾意見同網上片段睇到，走音甩咀都時有發生，要追上「亞洲第一」仲有好大空間。而且人氣高自然多job接，好難抽身鍛練技能，姜濤就試過跟彭秀慧學戲，但係因為工作而冇時間上堂。點樣令班仔嘅成長進度，跟得上人氣上升嘅速度，就交俾花姐諗啦！

黑歷史

對家同傳媒最想知各位鏡仔有冇秘聞好爆，手機年代任何過去言行同相片都永久留存，被人掘返出來亦唔出奇。韓國早排就有唔少藝人因為讀書時代欺凌同學嘅事件被揭發而星途受損。鏡仔們向來形象正面，一旦有咩黑歷史爆出，有幾大鑊可想而知。你睇保錡到而家都要遮樣見人反省中，就知幾大影響。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！