Mo爸李盛林牧師受訪透露治療實況稱MIRROR「嗰12個」 So Ching被大讚係不可多得嘅女仔

舞者李啟言（阿Mo）自去年MIRROR紅館演唱會期間發生嚴重意外後，至今一直留院治療。其父李盛林牧師每周透過代禱信交代阿Mo嘅進展，近日更接受YouTube頻道「健康嗎 Health Code」訪問，除咗談及對意外感受之外，佢亦有講到照顧囝囝阿Mo嘅點滴及透露治療實況。

李盛林牧師表示意外發生後，佢哋冇諗過咁大件事。佢喺重睇意外一刻嘅影片時，留意到阿Mo被幾百公斤熒幕擊中前嘅動作有將頭部微微傾前咗，如果唔係熒幕就會直插阿Mo頭部，即將「爆頭」。Mo爸憶述意外表示無助：「面對自己個仔處境，好無助，我點樣幫佢？又幫唔到。」及「如果擊中嘅係其餘23為舞者嘅其中一個，或者係嗰12個（指MIRROR）？佢哋會點面對呢？」另外，佢仲表示原本嘅頭髮係長啲，而哥哥更加係留有辮子，不過佢哋為咗鼓勵及支持阿Mo，所以剷咗光頭，當時阿Mo感到好感動。

Mo爸表示阿Mo唔可以好似平常人咁由夜晚瞓到朝早：「佢通常大概11點瞓，然後瞓到3點半就要幫佢轉身，轉身之後再拉筋，3點半一路維持到4點半，佢先可以再瞓返，到6點半佢就會醒，處理個人衛生﹑換衫﹑跟住食早餐。如果時間及天氣許可，佢就會喺戶外曬太陽，跟住10點鐘開始治療，就算佢幾咁疲累，一開始治療佢就會打起精神及積極去面對。」

為阿Mo治療嘅劉敏昌教授亦有喺影片中分享阿Mo嘅康復情況，期間講到阿Mo風雨不改咁每日接收治療，脊髓受傷嘅阿Mo接受超過10種康復儀器治療。至於阿Mo嘅近況，劉敏昌教授表示阿Mo右手嘅二頭肌有反應、及現時唔需要用尿喉，奇蹟地喺冇做手術嘅情況下將10粒膀胱石排出、可以自行吞嚥、好多併發症都冇出現、及說話非常清晰。

同時劉敏昌教授覺得阿Mo係一個戰士，大讚佢好堅毅、堅持、又要求及自律，而Mo爸就係一名真漢子，肩負起成個家庭。教授仲大讚阿Mo女朋友So Ching（蘇芷晴）係一個不可多得嘅女仔，因為佢睇到So Ching好關愛阿Mo，無微不至咁對待阿Mo，仲話阿Mo喺10月生日時，二人含情脈脈對望，背後充滿意義。

喺影片尾段，Mo爸表示有時見到佢做治療都感到心噏，有時甚至會流淚。佢表示作為父母，佢好希望囝囝可以好返，並話：「有一啲人話，牧師你個仔搞成咁，你仲要感謝你相信嘅神？我話係呀，我要感謝佢（神），因為唔係神嘅錯誤導致佢咁樣，係因為人為嘅錯誤，而導致到佢有咁大創傷，佢哋要承認呢一種錯誤，而唔係罰咗就算，好多呢啲要認真去檢視安全性，如果受傷係佢哋家人或者當事人，佢哋會唔會係一種僥倖心態，當佢哋設身處地，先至能睇到可以點做。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！