My Little Airport演唱會 驚見梁朝偉俞琤張叔平同場睇show

組成近20年嘅香港樂隊My Little Airport(MLA)上周展開一連6場演唱會《你告訴我一個昆德拉的故事 (sorry, the same old story)》，唔少樂迷都搶飛睇show，星期日晚舉行嘅尾場觀眾席更加星光熠熠。向來鮮有現身音樂會現場嘅梁朝偉，竟然都係MLA歌迷，竟然會去睇show！

除咗影帝之外，多次為梁朝偉演出嘅電影擔任美術指導嘅張叔平，都去睇MLA。席上星級觀眾仲有前商台話事人俞琤、張繼聰謝安琪伉儷、黃耀明、岑寧兒等。而同梁朝偉一齊坐嘅係音樂人黃丹儀，而丹儀老公陳輝虹都有睇show。

My Little Airport 唔止香港有fans，喺內地都有一定知名度，於是梁朝偉極罕現身睇MLA同時成為內地文青界話題。

MLA成立於2004年，由曾經喺TVB做撰稿嘅阿P同主音Nicole組成，首張專輯《在動物園散步才是正經事》已經打響名堂。MLA歌曲最突出嘅可能係歌詞風格，作品名稱如《親戚看見我一個人食吉野家》、《邊一個發明了返工》、《給金鐘地鐵站車廂內的人》已經別樹一格，內容更加貼近樂迷真實生活，因此成為唔少文青最愛。近年MLA差唔多每年都喺九龍灣Star Hall開音樂會，今次即使開6場都爆滿，叫座力更勝好多歌手。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！