ToNick主音恆仔自揭患抑鬱症一年「爭啲想走」 前女友小花IG出Story回應
樂隊ToNick主音恆仔(趙善恆),上年2月與譚杏藍(小花) 結束10年情,4月再受喪父打擊,之後佢不時上載跑步相,看似走出失戀及失去至親嘅痛,但係佢喺噚日(19日)於社交網站發千字文,自揭「抑鬱咗一年 爭啲想走」,最後佢就表示自己用咗一年時間去調整心情,而家已經開始一段新戀情。而其前女友小花喺噚晚亦有出IG Story回應。
恆仔上載一張黑色圖片,除咗自揭患上抑鬱症一年仲「爭啲想走」 之外,佢仲提到「當每一個人關心問我點佢哋都會不經意咁講一句:原來你乜都唔知㗎?然後我就會聽到一個新嘅人名」 ,不禁令人聯想到恆仔前度譚杏藍疑似出軌,令唔少網民去咗小花IG留言鬧爆。
對於被質疑出軌,小花亦有喺IG出Story回應:「十年來我只希望擁有幸福快樂及盼望未來的一段關係, 而一段感情應該是雙向的, 不是一人一手可以控制大局。過去交往的日子,付出從來不問回報。 感謝遇上你讓我成為一個更好的伴侶。 對人對事我問心無愧,心裡的傷口希望可以慢慢癒合。 真心祝福你們,兩位都曾經是我最親近的人,過得幸福快樂。 今天是你演唱會開賣的大日子,祝一切順利。 感謝媽媽、男朋友的陪伴及朋友們的關心。 最後,面對一切流言蜚語真的不容易, 我只想做好自己本分,不想回望, 活好每一天,繼續以建立家庭為目標努力生活。 」
呢個Story一出,唔少網民都覺得小花充滿機心,留言話「擺明博恆仔唔會再回應,依家係度混淆視聽」、「大姐明依家先走去祝福人,攞彩定贈興?」、「分咗手都仲要繼續恰人」、「自己偷食先再分手,之後人地同自己朋友一齊左 依家成段講到係男方出軌」、「睇得出佢係串恆仔做新聞宣傳演唱會飛,同一時間話佢唔願意結婚。」及「兩位曾經我最親近的人,祝你兩位幸福快樂。暗爆恆仔同佢朋友搞埋一齊?」等等。同時亦有網民認為恆仔博宣傳:「Close file啦 男果個早唔講遲唔講 賣飛先講 女果個就唔知有無帽人」及「咁又遲唔講早唔講,成年揀今日先講又有啲怪」 等等。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!