TVB｜網民列出5套神劇之最 欣宜曾靚抽鄭少秋《大時代》金句引抗疫共鳴

TVB咁多年嚟拍過無數劇集，近年被批評質數每況越下，就連劇情都唔及以前。TVB過往的確衍生出多套熱度極高嘅經典劇集，甚至被封為「神劇」；近日就有網民喺討論區以「當年細個最鍾意嘅TVB電視劇係咩」為題，引發連串討論，唔少網民都列出心目中「神劇」，例如《賭場風雲》、《衝上雲霄》、《美味天王》等等；總括網民名單，其中以下5套最多人討論，唔知又係咪你心水？

《無頭東宮》
2002年古裝劇《無頭東宮》為當年倉底貨，但播出時竟然爆紅。劇集由向海嵐、陳妙瑛、張兆輝及魏駿傑主演，講述凌雲（向海嵐飾）唔想出嫁而離開老父並故意裝醜，以避開上門求親者。喺一次園遊會中無意中救起微服出遊嘅皇帝（張兆輝飾），及後被納為妃；楚楚（陳妙瑛飾）因妒忌而欺騙凌雲，搵嚟江湖術士將二人容貌交換，命運從此逆轉。向海嵐與陳妙瑛換面一幕，詭異又創新，成功令觀眾留下深刻印象，直至宜家都成日有網民提起希望劇集重播。

《大唐雙龍傳》
《大唐雙龍傳》雖然將原著小說大幅改編，但2004年播出後仍大受歡迎。劇集集結當年TVB力捧嘅新晉小生花旦，包括當年僅23歲嘅唐寧、胡定欣以及25歲嘅吳卓羲，林峯，仲有楊怡，網民更指當年楊怡並未「變面」，五官精緻，可謂佢最靚嘅時期。唔止演員吸引，主角錯縱複雜嘅感情線亦猶如古代版青春愛情劇；林峯更憑此劇首度喺馬來西亞稱帝，吳卓羲亦獲2004年飛躍進步男藝員獎，二人露出白滑屁股嘅出浴戲一度成為話題，而網民亦相當懷念徐子陵（吳卓羲飾）與婠婠（胡定欣飾）呢對CP。

《隔世追兇》
2004年《隔世追兇》被譽為懸疑神劇；劇集由郭晉安、陳慧珊及許紹雄主演，亦係商天娥當年重返TVB首部參演嘅劇集。劇情講述重案組高級督察何天光（郭晉安飾）與已過身嘅爸爸何大河（許紹雄飾）重新透過「大哥大」電話穿越時間溝通，由於何大河生前係便裝警員，佢兩個就透過舊線索與新科技共同追查真兇，從中亦加深咗父子情，令觀眾睇得緊張又感受到親情可貴。劇集亦充滿笑位，其中石修喺劇集催眠術神乎其技，一句「你流緊血，你睇下地下，一滴、兩滴、三滴」就成功催眠對方，被稱為「石修催眠術」，至今仲成日有人提起。

《青出於藍》
《青出於藍》主題曲「同學各位找個位 這是你的開學禮」呢句歌詞相信唔少80、90後都識唱，仲成為中學開學必選歌曲。《青出於藍》於2006年播出，由歐陽震華、陶大宇、郭可盈領銜主演，並以校園生活為藍本，講述賈濟材（歐陽震華飾）、曾政良（陶大宇飾）及王若詩（郭可盈飾）三角感情故事及一眾學生嘅校園搗蛋事。劇集起用一班新人出演，例如因此劇擦出愛火花嘅趙頌茹與周永恆、鄭俊弘、2002年以《TVB周刊》cover girl選舉入行嘅沈卓盈及梁競徽（前名梁烈唯），呢套更加係梁競徽同沈卓盈喺TVB嘅處男處女作。

《大時代》
1992年《大時代》被指為世紀神劇，唔單止集結鄭少秋、劉青雲、劉松仁、郭藹明、藍潔瑛、周慧敏等一線演員，以60年代到90年代金融市場為主線背景，講述兩代之間恩怨情仇，展現名利與人性糾纏嘅劇情深受歡迎，即使後嚟重播多次，都仍然令觀眾追住睇；劇集亦衍生出唔少金句，例如「技術性調整」、「畀次機會吖老細」等對白都係網民cap圖熱選；其中，丁蟹（鄭少秋飾）喺樓梯講述自己成為通緝犯後偷偷重返香港，日常生活範圍只限在家中及超級市場嘅一幕，更加喺2020年被網民重提，指講中港人抗疫心聲，鄭欣宜亦喺IG分享片段，寫道：「大家現況也如此吧」，引起網民共鳴。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！