TVB下星期凌晨重播《心花放》 又有得睇陶大宇經典掩面！

現年58歲嘅「師奶殺手」陶大宇入行超過30年，早前翻唱劉德華嘅《倒轉地球》，其唱腔及「水撥式」台風令佢人氣爆燈，更獲大批網民愛戴，兼力推佢上樂壇頒獎禮。一講到陶大宇，除咗《倒轉地球》之外，當然唔少得佢喺劇集《心花放》嘅經典掩面動作同發出「呀」一聲啦！唔知無綫係唔係食住佢爆紅個勢，喺下星期二（21號）凌晨時段重播《心花放》，想睇陶大宇嘅經典掩面嘅話，千祈唔好錯過呀！

2005年劇集《心花放》，由陶大宇、郭可盈、陳豪及廖碧兒等人主演，劇情主要講述父母離世後，大哥林一江（陶大宇飾）獨立養大及照顧一班細路妹二洋（蘇志威飾）、四海（梁烈唯飾）及小湖（唐詩詠飾）。陶大宇一直對細路三河（陳豪飾）走散耿耿於懷，最終佢同已經改名做薛水嘅三河相認。陶大宇喺劇中飾演林一江，經常展現單手掩面並發出「呀」一聲，佢曾經喺接受傳媒訪問時講過刻意為咗令角色有新鮮感，所以為林一江自創小動作，開心同唔開心嘅時候都用得嘅動作。呢個經典動作喺劇中經常出現，甚至有網民計過至少有21集（全劇30集）出現過，所以有網民認為動作又煩又浮誇。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！