TVB力捧6位新世代藝人成「台慶六星」 郭柏妍小性感上陣

TVB每年11月19日台慶都係重點大騷，今年TVB 57周年台慶主題為「同一家人，與你前行」，現時已計劃多個宣傳活動，包括搵嚟一班小生花旦拍攝台慶宣傳片，除咗劉穎鏇、朱敏瀚、應屆香港小姐冠軍倪樂琳，以及《吃貨橫掃》系列幾位主持、東張女神，更打造全新「台慶六星」，包括周嘉洛、郭柏妍、游嘉欣、戴祖儀、吳偉豪及丁子朗六位新世代藝人。

「台慶六星」喺宣傳片以科幻未來感運動裝亮相，郭柏妍以Sport Bra及短褲造型上陣，被笑指係錫紙裝扮，游嘉欣則身穿銀色外套及迷你短褲，形容自己係宇宙戰隊成員，以白色連身短裙上陣嘅戴祖儀，背後就中空設計曬出美背，不過佢就直言自己似「護士姐姐」。吳偉豪與丁子朗就身穿無袖背心，大騷麒麟臂，而周嘉洛就最密實。「台慶六星」所拍攝嘅宣傳片充滿科幻感，喻意由六位新星將TVB嘅精神同節目發放到全世界。

另外，TVB早前宣布8大台慶綜藝節目、台慶專題紀錄片《無窮之路IV-一帶一路》及落實多部台慶劇首播日期。8大台慶綜藝節目包括王牌節目《獎門人台慶感謝祭》、《中年好聲音3》及載譽歸來的《Grand住去大阪》（上一輯為《Grand住去台北》），更有全新製作的《呃錢》、《戰場上》、《與天地對話》、《自駕德島》以及相隔20年再度強勢推出嘅電視電影《尋夢琴澳》；《尋夢琴澳》將由三大視帝陳展鵬、譚俊彥、馬國明夥拍胡定欣、林夏薇、張曦雯主演。至於，由楊茜堯（前名楊怡）、王浩信、林夏薇、馬志威、黃翠如及楊卓娜等演員演出嘅《黑色月光》定檔於10月28日播出，為楊茜堯相隔7年後回巢嘅作品。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！