《TVB周刊》印刷版停刊變網上版 細數邊位藝人做過最多次封面?
![image](https://s.yimg.com/ny/api/res/1.2/KlI1VuJR24Y6MeIdDdv8hA--/YXBwaWQ9aGlnaGxhbmRlcjt3PTk2MDtoPTY2MA--/https://s.yimg.com/uu/api/res/1.2/pSxZ8byzHYP2XBBz72Epwg--~B/aD04ODA7dz0xMjgwO2FwcGlkPXl0YWNoeW9u/https://78.media.tumblr.com/150cc793126cc6ab01fa99accd427775/tumblr_inline_pdyc4rr8ay1u03abq_1280.jpg)
近年買雜誌嘅人愈來愈少,導致部份紙媒轉型變網上版。近日連歷史悠久嘅無綫旗下官方刊物《TVB周刊》亦宣布印刷版停刊變成網上版。有指無綫一直未同員工正式公佈詳情,直至無綫日前宣佈中期業績,員工先知道周刊將停刊。
逢周一出版嘅《TVB周刊》由1997年推出第一期,由肥姐沈殿霞和女兒鄭欣宜做封面,一書兩冊賣8蚊,直到而家賣13蚊,已經有21年歷史。雜誌主要介紹TVB新節目、藝員訪問、主婦最鍾意嘅劇情介紹、節目表及連載小說等等,吸引唔同年齡層嘅人睇。
![image](https://s.yimg.com/ny/api/res/1.2/Dw_sQ_ttW5RMmEyXW0AbdQ--/YXBwaWQ9aGlnaGxhbmRlcjt3PTk2MDtoPTEyMDU-/https://78.media.tumblr.com/4818ec2c732dc78f24a95012ae6f885c/tumblr_inline_pdyc4zlwB71u03abq_1280.png)
《TVB周刊》嘅前身係《香港電視》,第一期封面人物係梁醒波,係喺無綫開台日(即1967年11月19日出版)同步創刊,每冊兩毫子,雜誌內容同《TVB周刊》差唔多,都係無綫節目,演員動向等。《香港電視》經營咗30年,出版過1556期,到1997年5月易手予南華早報,同年8月27日停刊。當年除咗搵當紅名星例如汪明荃、鄭裕玲、梅艷芳、鄭少秋、沈澱霞、梁朝偉、周潤發等等做封面外,仲會有啲國際大事做封面,例如太空船登陸月球、日劇《青春火花》、金像獎、金雞獎等等都做過封面。如果要數做得最多期封面人物嘅一定係入行51年嘅無綫「鎮台之寶」汪明荃(汪阿姐),原來佢做過53次封面,認真厲害。至於第二多嘅就係鄭裕玲(Do姐)都有30次㗎!