TVB惡人代表變新會陳皮大王 林敬剛轉戰飲食界 內地搞燉湯店
多年嚟喺劇集演過唔少惡人同反派嘅TVB綠葉藝人林敬剛(King Kong),睇落惡形惡相,但原來好有生意頭腦。除咗拍劇之外,52歲嘅林敬剛仲喺廣東新會開擁有佔地約200畝嘅柑園出產果皮,年產過160萬斤而被稱為「陳皮大王」。King Kong近期仲喺新會做埋飲食開燉湯店,主打即叫即蒸,仲親身拍片介紹……咦,楊明,要唔要學吓嘢?
飲食以外,林敬剛早前亦喺內地平台推出自家製綜藝節目,仲搵到佘詩曼、黃宗澤等人拍片力撐。人緣好,難怪撈得掂。
呢期重播嘅劇集《新紮師兄》,1984年首播時令唔少年青人投考警隊,林敬剛就係其中一個,當時佢決定投考香港警察少年訓練學校。不過喺入學堂前,林敬剛被李修賢睇中拍電影《壯志雄心》。到入學堂一個月後,林敬剛發覺對演戲產生興趣,決定退學並到電影公司工作。1994年林敬剛加入TVB成為藝員,做主持之外亦參與多套劇集拍攝,例如《O記實錄》、《烈火雄心》、《潛行狙擊》、《鐵探》及《法證先鋒IV》等等。林敬剛因為霸氣外型而將「惡人」角色演得淋漓盡致,所以被封為「TVB御用惡人」。而現時林敬剛同TVB仍然有約在身,早前《一舞傾城》佢都有份演出。
前年四月,林敬剛出席內地電影《創業大贏家》開鏡活動時,向萬梓良跪地拜為師,後獲萬梓良賜名「林犇」,成為周星馳、林家棟及姜皓文之後萬子哥第四位徒弟。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!