TVB播《獎門人》對撼《全民造星V》 網民批噴奶環節嘔心兼唔衛生:睇到我想嘔!
ViuTV選秀節目《全民造星V》噚晚(16日)喺九展舉行總決賽,觀眾透過直播見證冠軍誕生,總決賽除咗安排過去四屆嘅師兄師姐跟10強一同進行表演項目之外,仲有首屆冠軍姜濤以大師兄身份壓軸登場表演《鏡中鏡》;而對手TVB就以《獎門人 Happy Summer感謝祭》及《中年好聲音2 100強大召集》搶收視,不過《獎門人 Happy Summer感謝祭》嘅「啖啖奶」環節就被網民狠批嘔心及唔衛生。
《獎門人 Happy Summer感謝祭》繼續由「獎門人」曾志偉帶領「獎老」錢嘉樂、麥美恩、林秀怡和程浩駿擔任主持,佢哋更以《櫻桃小丸子》造型登場,而嘉賓就包括有《濠玩夏水禮》嘅「好玩隊」陸浩明、朱智賢、楊潮凱、黃婉恩、關楓馨及何浩文,對戰「喪玩隊」林盛斌(Bob)、蘇韻姿、邵初、阮兒、周志康及陳婉衡。今集有兩個經典遊戲(「開心無敵Short Short哋」和「開心無敵啖啖奶」)重現,「獎門人」曾志偉更表示好耐冇玩「開心無敵啖啖奶」,呢個遊戲非常刺激,亦係佢最鍾意嘅遊戲之一。玩法就係每隊每輪派出一名隊員,估「敵方」邊一位隊員個口入面喺冇牛奶,如果估錯嘅話就要慘被噴奶。
除咗蘇韻姿及朱智賢慘被噴奶之外,阿Bob估極都唔中,結果被陸浩明、朱智賢、楊潮凱、何浩文及關楓馨連番噴奶,畫面既瘋狂又嘔心。節目出街後,TVB及阿Bob亦有將片段分別放上YouTube及IG,雖然阿Bob被網民指玩得投入及敬業樂業,不過亦有唔少網民指環節嘔心及唔衛生,例如「好嘔心呢個遊戲」、「好慘」、「全部嘔心遊戲」、「唔覺得好笑,淨係覺得好核突!」、「唔好意思真心唔覺得好笑,呢啲節目仲要低俗當有趣,希望Bob下次可以更有智慧選擇上電視節目啦」、「黐X線節目」、「好核突」、「好噁心喔, 不衛生。」、「我真的想投訴他們,讓他們禁止玩這個遊戲」、「藝員如果有病唔知,咁噴法,對方吸左入鼻咪感染點算。」、「不覺得好笑!因衛生問題,好嘔心!接受不到呢個環節。除了接食(接爆咀)環節之外,其他環節不錯,好搞笑!希望下次再好玩些!除了衛生問題之外就可以」及「睇到我想嘔」等等。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!