TVB皇牌節目都要讓路？《亞洲超星團》11月25播出 《愛・回家》一周七集變六集

TVB皇牌節目《愛・回家之開心速遞》一向都係收視保證，憑住搞笑而且貼近時事嘅劇情一直穩居收視嘅頭幾位， 更加令到唔少藝人成功入屋，演藝事業大躍升，以上星期嘅數據而言，《愛・回家》最高收視20.8點（134萬觀眾），比台慶劇《羅密歐與祝英台》及《叠影狙擊》收視都高，所以節目喺2019年12月31日開始由原先一至五播出，變為一至日播出，每個星期播足7日。不過，最近呢套被譽為係TVB收視保證嘅處境劇竟然都要讓位，改為一星期只播6日。

《愛・回家》今次嘅讓路，係為咗遷就由11月25日（六）晚上8點-9點半開始播出，由TVB同內地星空衛視聯合製作嘅選秀節目《亞洲超星團》。節目集結65名參賽者，透過節目選出七人男團，當中參賽者包括TVB藝人丁子朗、「聲夢學員」冼靖峰、黃奕斌，及「洪欣兒子」張鎬濂等等。因此，《愛・回家》由11月25日起就會改為一個星期播出六集，直至《亞洲超星團》播映完畢，暫時預計會維持到明年1月底《愛・回家》先會恢復一星期播出7日。

其實《愛・回家》一向都有唔少觀眾歡迎，收視好之餘亦都係唔少人茶餘飯後嘅話題，就連劉鑾雄（大劉）早前開記招都提及自己「耐唔耐都有睇《愛・回家》」。儘管早前因楊明加入而有網民聲言抵制，令收視一度稍微下跌，不過依然比唔少正劇嘅收視高，絕對稱得上係TVB嘅皇牌節目。