TVB藝人宋懿芳無端被追數 收數佬供出同「配音組陳欣」有關

2021年TVB藝訓班嘅宋懿芳(Ken)，曾被招攬同羅天宇、丘梓謙等人組成男團SUPER TIGER。Ken喺IG限時動態爆料，指最近無端被人追債。而對方仲話係同「配音組陳欣」有關。

Ken上載嘅對話截圖當中所見，疑似「收數佬」講完開場白之後，Ken反問點得知佢個人資料。「收數佬」就回覆「配音組 陳欣」，更加出言恐嚇兼報上Ken嘅地址。Ken回覆對方時強調唔識陳欣，更唔清楚點解會有晒佢資料，揚言已經報警，仲叫「收數佬」搵返陳欣。Ken另外又寫咗個post俾陳欣，話「上網一查發現，原來你係慣犯」，又叫「認識陳欣的人，請通知他盡快出嚟處理自己的問題」。

翻查資料，資深配音人龍天生2年前都有類似經歷，當時佢喺社交專頁表示參與TVB《好聲好戲》節目時同一位「知名陳姓配音員」同場，但後來竟然被對方出賣個人資料，令龍天生被收數佬喺演藝人協會門外貼大字報、收到恐嚇電話、寄恐嚇信去屋企，甚至喺所住大廈派大字報。睇返當日《好聲好戲》陣容，有份參與嘅陳姓配音員又得確只有陳欣一個。

53歲嘅陳欣自細對配音充滿興趣，初中就去讀配音課程，15歲入行當兼職，中學畢業後全身投入配音工作。陳欣最經典嘅演出包括為《大長今》閔大人、《名偵探柯南》嘅毛利小五郎、《櫻桃小丸子》嘅旁白，同埋《獎門人》系列做報幕。陳欣女友鄭麗麗都係配音藝員。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！