TVB資深配音員陳欣離職 代表作有《獎門人》旁白 曾捲欠債風波

TVB配音員離職潮不斷，繼日前梁志達、許盈、廖欣怡、蕭徽勇離職，昨日（27）又傳出資深配音員陳欣離任，FB專頁「日韓動漫綜藝配音影視資訊站」及「哥頓聲館庫」均發布陳欣離開TVB嘅消息，並指TVB配音組尚餘42人，據悉將陸續有其他配音員離職。

陳欣1984年以自由身配音員身份接洽工作，其後先後加入亞視和無綫配音組，至今已於唔少劇集、綜藝節目和電影獻聲，代表作包括《獎門人》系列旁白、《櫻桃小丸子》旁白、《Running Man》劉在錫配音、聲演《東京愛的故事》江口洋介、《大長今》池珍熙等等；也曾於電影中為李連杰、郭富城、單立文及鄭伊健等人配音，以及曾於90年代替移民嘅鄧榮銾擔任成龍第二代指定配音員。陳欣曾於2021年罕有地走到幕前，擔任綜藝節目《好聲好戲》評判，並於節目即場開口講：「《好聲好戲》星期一至五晚十點半翡翠台。」及《獎門人》嘅旁白：「本輯節目獎金獎品非常豐富，其中包括……完咗節目再話你知。」，令全場嘩然拍手。陳欣除咗被讚配音強勁，帶有親切感，更被賴慰玲大讚真人後生靚仔。

然而，陳欣曾於去年捲入欠債風波。TVB藝人宋懿芳於IG上載多張對話截圖，表示收到有人WhatsApp追數，又指自己無啦啦做咗「TVB配音組陳欣」擔保人，惟宋懿芳指自己唔認識陳欣，亦無簽過任何擔保，疑被陳欣盜用資料，於借錢時寫做聯絡人及擔保人。2021年，資深配音員龍天生亦指收到恐嚇電話及恐嚇信，表示自己早前於《好聲好戲》與一位知名配音員同場，對方向貴利借錢後，借錢人搵唔到佢於是自己無辜被恐嚇。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！