TVB Plus本月22日啟播 加強與觀眾互動元素 《港女野人2》、《直播靈接觸》陸續登場

通訊事務管理局（通訊局）喺噚日（15日）批准無綫電視（TVB）嘅改動申請，85頻道就將推出「鳳凰衛視香港台」，而82頻道「TVB Plus」就會取代原有嘅J2，改動將於下星期一（22日）生效。而TVB就喺今日下晝進行啟播記者會，介紹一系列嘅全新綜藝娛樂電視節目俾大家。

TVB Plus係一個綜合頻道，將會提供戲劇、非戲劇、財經及體育等一系列嘅多元化節目，同時亦係一個實驗性內容及形式嘅平台。今日嘅記者會，TVB搵嚟許文軒及潘盈慧擔任司儀，指TVB Plus將於本月22日早上6點啟播及介紹新台徽，並將來會與myTV SUPER、TVB.com及鄰住買合作，加強與觀眾嘅互動元素。

記者會播出影片介紹頻道嘅六大功能，財經資訊主要喺早上及下午播放，而晚上就主要播放娛樂及綜藝節目，而體育、賽馬及六合彩都會係該頻道播放。之後就輪到一班主持上台為自己嘅節目進行介紹，除咗財經、賽馬及六合彩節目之外，仲有直播部分巴黎奧運賽事及令人期待嘅綜藝節目，包括由蔡雪瑩、黃婉曼、倪嘉雯、廖慧儀及黃嘉雯主持嘅飲食節目《美食新聞報道》、由顧定軒、馮皓揚及倪嘉雯主持嘅飲食節目《我們家的料理》、林映暉（暉哥）及黃紫恩（Jojo）嘅旅遊節目《台灣萌萌的》、鬼王梁思浩主持嘅恐怖靈異節目《直播靈接觸》及何泳芍、陳若思、廖慧儀及胡美貽主持嘅《港女野人2》等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！