WATERBOMB｜RAIN壓軸演出震撼樂迷 主辦方安排極差被鬧爆

韓國知名音樂節《WATERBOMB HONG KONG 2024》今年首度來港舉辦，噚晚（2日）圓滿結束。盛事邀請咗多名本地及國際巨星登場演出，包括Jay Park、Hyuna泫雅、RAIN、Jessi及LollyTalk等表演嘉賓，大批觀眾及唔少藝人都有入場欣賞，不過今次音樂節亦都引嚟唔少爭議，主辦方日前亦有就事件公開致歉。

難得有咁多韓星演出，全場觀眾都熱血沸騰，當中以天王RAIN嘅壓軸演出最為震撼樂迷，RAIN除咗又唱又跳之外，仲除衫大騷肌肉，期間仲落台與觀眾進行近距離接觸，並話：「我有一個好消息宣佈，我將會喺香港開騷，你們會支持嗎？香港你地好嗎，我好掛住你地，你們覺得今晚OK嗎？不如一齊狂歡啦！」

呢場盛事吸引唔少藝人入場，例如港姐郭珮文（Juliana）、聲夢小花林君蓮、林沚羿、DJ LOKYII 樂宜、Stanley@MIRROR、其女友李炘頤（Alina）及蔡寶欣（Pony）等等。「大表哥」Stanley就因為見到偶像RAIN表現興奮，仲喺台下瘋狂尖叫、跟着跳唱兼模仿偶像嘅招牌摸胸動作，超級興奮。

入得場嘅觀眾一定預咗濕身，不過佢哋紛紛怒轟主辦方安排差，因為觀眾喺開場前都會將自己嘅袋拎去寄存，不過喺完騷後竟然要冒雨等三至四個鐘頭都拎唔返自己個袋。另外，亦有觀眾出PO鬧大會嘅寄存物品tag係用紙做，而唔係用防水物料做，完騷後啲tag已經溶溶爛爛兼甩色，導致難以辨認。之後大會由排隊拎袋變嗌冧巴拎，除咗冇人聽到佢嗌冧巴之外，大會仲唔會檢查個袋係唔係你嘅，因此有唔少人亦表示唔見嘢。

為咗泫雅入場嘅ViuTV藝人蔡寶欣就表示貼錢買難受：「鐘意咗真係有14年嘅偶像！ 基本上每一次泫雅嚟香港，我都唔會skip佢每一個show，但經過今次嘅經歷之後要永別所有玩水音樂show。是日課題：到底我買VIP飛係做乜？ 雖然知道落雨打風大家都難上加難，但係咪真係冇 plan B？ 我見有啲人買咗 VIP飛，但原來VIP飛寄存嗰個位係會截龍架，啫係要拎住個袋玩！？但啲水嘅量係s2o咁由頭濕到落腳趾尾，同埋條隊係好似排極都排唔完，見到啲妹豬凍到個嘴都白哂。 知玩水嘅嘢都係預咗麻煩，寄存、換衫、去廁所、地下全是垃圾泥地，都係有曬心理準備嘅，但今日情況真係好惡劣，只希望在場人士唔好凍親唔好病， 啲工作人員又係慘，主辦安排得差但氣佢哋受哂，真係No more next time 對唔住 泫雅~水show真係嚟唔到了 WATERBOMB」。

另外，亦都有網民指演出藝人時間被縮短，當中韓國女團TripleS演出時間更被縮短一半，由原定30分鐘減至15分鐘，引起部分網民不滿。對於種種爭議，主辦方亦有於社交網站發聲明向參與第一場兄觀眾致歉，指受颱風影響，現場部分設施受到嚴重損毀，基於安全考慮，主辦方經努力搶修及加固後，已第一時間安排觀眾進場，導致開場時間押後及部分藝人演出時間有所調整。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！