YouTuber Kenny疑捉走紅磡北帝廟放養貓被捕 曾自揭身世 出位言行惹網民關注

紅磡北帝廟廟祝多年前領養花貓「樂樂」，平時會喺廟內放養，不過「樂樂」喺上周四超強颱風「摩羯」襲港時失蹤。有網民喺網上尋求「樂樂」，期間發現YouTuber Kenny喺tg群組表示自己喺打風當日救走流浪貓，及後分享一張與疑似「樂樂」嘅合照。之後有網民問佢呢隻貓係唔係「樂樂」，但就被即時踢出群組。

喺前日（9日）晚上，紅磡警署接獲一名77歲姓關男子報案，指馬頭圍道146號嘅寺廟內，有一隻年約9歲嘅放養貓不知所終，之後更發現喺社交平台有人抱住疑似係失貓「樂樂」。去到今日，警方以涉嫌「盜竊」喺紅磡拘捕一名男子，更尋回「樂樂」，據知被捕人就係YouTuber Kenny。

本名陳嘉偉嘅Kenny Chan，喺2018年2月27日創立頻道，並喺同年4月30日上載第一條影片，成為YouTuber，主要都係推出一啲無厘頭嘅生活影片。佢最出名嘅一條片應該係《〈試飲劇場〉 $22/1打「維他VITA低糖Low Sugar VLT檸檬茶」！到底好冇飲？》，當時大受歡迎，當中嘅一句「愛你啾咪」，更加成為當時年輕人嘅流行語。另外，過往佢都有唔少出位嘅言行，例如喺商場自設粉絲見面會等等。

上年，佢接受YouTube頻道《解密工作室》訪問，期間仲透露咗自己嘅身世，指當時四十幾歲嘅爸爸同二十幾歲嘅媽媽喺親戚介紹下結婚，而爸爸同媽媽當時係冇一齊住，佢哋甚至冇計劃生BB，喺佢出世後將佢交俾姑媽照顧，所以佢同媽媽係冇感情，好似陌生人咁，不過佢之後都選擇同媽媽同住。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！