九龍城寨之圍城｜「婆仔Mary」楊依依60歲入行曾出演女主角 無忌諱瞓棺材拍戲好專業

電影《九龍城寨之圍城》自5月1日上畫以來好評滿滿，票房走勢持續凌厲，暫時榮登香港電影史上華語電影總票房第2位，更有望超越第一位《毒舌大狀》嘅1.15億票房。電影中有唔少演員表現被激讚及獲得關注，除咗城寨四子、「奸角」王九及魚蛋妹之外，飾演寨民「婆仔Mary」嘅楊依依同樣搶眼。

楊依依喺戲中飾演寨民「婆仔Mary」，佢除咗成日去理髮店搵龍捲風（古天樂飾）傾閒計，期間仲跳舞及投訴有人偷女性內衣褲，而佢有向龍捲風投訴後巷有異味，於龍捲風及信一（劉俊謙飾）前往了解，並發現性工作者「魚蛋媽」（李紫僖飾）嘅屍體高掛於後巷嘅電線上，雖然佢嘅戲份唔算多，不過足以令觀眾留下深刻印象。

現年83歲嘅楊依依喺廣州出世，爺爺係一名中醫，而父親就係著名粵劇作家楊子靜，不過佢並冇跟隨爸爸入行，因為爸爸要佢專心讀書，最後佢大學畢業，喺內地成為一名小學老師。

至於感情方面，佢與老公結婚後誕下兩名女兒，而老公因為香港有生意，所以有幫佢申請嚟香港，不過一直未有獲批，導致二人分隔兩地，最終因男方有外遇，而導致離婚收場，後來老公極力挽留，二人復婚，然後再誕下多兩名女兒。80年代佢獲批嚟香港，並成為一名護士，之後被曾經照顧過嘅病人聘請做私家看護，直到60歲退休。

唔打算退休嘅楊依依，喺好友夏雨、黎宣及盧海鵬嘅建議下到TVB試鏡，面試期間被要求表演喜怒哀樂表情，結果佢一take pass，成功加入TVB做特約演員。入行多年嚟，佢參演過唔少劇集，角色都令人印象深刻，例如《踩過界II》飾演徐榮癌末媽媽及《愛·回家之開心速遞遞》飾演八姨婆等等；同時佢亦有參與唔少電影拍攝，例如《竊聽風雲》、《殺出個黃昏》及《我老婆唔夠秤2：我老公唔生性》等等，更曾經喺英國電影《When the sun rises》出演女主角。佢仲試過喺梁詠琪執導嘅愛護動物協會微電影《被遺棄的》演出，需要一位長者瞓棺材及用其照片做拜祭，由於冇人願意做，同佢一自薦做，梁詠琪就好高興。另外，佢仲試過幫九間大學的學生拍攝畢業電影，演出經驗非常豐富。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！