福祿壽訓練學院｜陳懿德不惜扮鬼扮馬挑戰跳唱 主持功力亦被讚賞 網民：近期做得好嘅女司儀

由阮兆祥、王祖藍、李思捷主持嘅TVB扮嘢真人騷《福祿壽訓練學院》，搵嚟郭珮文（Juliana）及陳懿德（Rachel）擔任「扮工室助理」，二人喺節目中落力演出，不顧形象地扮醜角而人氣急升。節目喺前晚（30日）播出《福祿壽訓練學院終極對決》，結果由「翻版鄭中基」陶大衛獲得「專業評審大獎」及「終極扮嘢王」成為雙料冠軍。

前晚除咗有汪明荃（阿姐）及學員們嘅精彩演出之外，「扮工室助理」郭珮文及陳懿德亦組成限定女團「穿S」，演繹Twins嘅經典歌曲《明愛暗戀補習社》。二人唔單止挑戰唱歌跳舞，仲要重現埋Twins嘅招牌側手翻。

《福祿壽訓練學院》陳懿德努力展示自己嘅主持功力，並不惜扮鬼扮馬及挑戰跳唱，除咗獲曾志偉大讚「深藏不露」，更獲網民高度讚賞，例如「無論任何角色好演員一定全力去做好 德德真女神 加油,努力 撑硬女神每個演出」、「德德做MC其實都幾屈機 聲線夠大唔怯場」、「真係算近期做得好嘅女司儀」、「有啲似早期mayanne」、「德德臨場同司儀能力真係幾好 近呢幾年女司儀 除左麥美恩 都冇咩人特別突出」及「德德真係 carry 晒 雖然 ju 好過最初」等等；相反郭珮文就經常被指好似遊魂。

26歲陳懿德（Rachel）於中文大學新聞及傳理系畢業，本身更有聲樂8級資格，2021年參加香港小姐競選，最後八強止步，但仍獲TVB賞識簽約。2022年被安排加入《東張西望》，並被稱為「東張女神」之一，同時於《香港小姐再競選》勇奪季軍，之後開始參與多個綜藝節目及晚會嘅主持及司儀工作，工作量越來越多之外，亦深受網民愛戴。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！