《九龍城寨之圍城》逆市破1.1億票房封王 香港戲院上半年票房收入再跌17％︳電影LOL

2024年過咗一半，香港票房有限公司尋日就公布咗2024 年上半年度票房數字。各戲院今年頭6個月嘅票房總收入約為6億4千萬元，與去年同期嘅7億7千幾萬元相比，按年下跌約 百分之17。

本地戲院收入自社會運動及新冠疫情後已大不如前。2019年全港戲院票房總收入達到19億2千幾萬，撇除疫情限制令戲院關門嘅2020－22年，到2023年戲院回復正常營業，全年收入得返14億幾。如果以今年上半年數字推算，要追上2023年嘅全年票房，似乎各方面都真係要加把勁。

至於以各套上映影片嘅票房而言，港產片上半年收入之冠係《九龍城寨之圍城》，票房高達1.1億元，只要收多5百萬左右就可以打破去年《毒舌大狀》嘅紀錄，成為史上最賣座港產片。不過《九龍城寨之圍城》入場人次有近160萬，已經超越《毒舌大狀》，以中西片計總入場人次排史上第2。

港產片上半年五甲作品依次序係《飯戲攻心2》（3735萬元）、《盜月者》（2754萬元）、《12怪盜》（2231萬元）及《臨時劫案》（2122萬元），全部都破2千萬大關，當中2套係以MIRROR成員為主角。今年3套港產賀歲片全部打入前5名，《飯戲攻心2》比第一集票房少差唔多一半，而《臨時劫案》靠口碑追返上嚟，埋單只係落後《盜月者》6百幾萬。

荷里活上半年本土票房麻麻，西片喺香港嘅成績同樣唔多靚仔。今年上半年香港上映外語片最高票房收入嘅係《沙丘瀚戰︰第二章》，收近3千6百萬元。過去呢類大片加埋有IMAX場次，閒閒地都5千萬票房，《沙》居然4千萬都冇的確幾跌眼鏡。其餘4套最高票房外語片分別係《哥斯拉x金剛︰新帝國》(2517萬）、《劇場版 Spy X Family Code : White》(1826萬）、《功夫熊貓4》（1581萬）及《猿人爭霸戰︰猩凶帝國》（1451萬）。呢期橫掃全球票房嘅《玩轉腦朋友2》下星期喺香港上畫，仲有《死侍與狼人》、《壞蛋獎門人4》等都好有機會吸納觀眾，希望可以谷起戲院市道。

更多電影文章

壞蛋獎門人4／無聲絕境外傳：首襲日／長夜盡頭的微光／走走停停︳電影LOL 今期睇咩戲

紙盒藏屍案電影開拍中 Edan呂爵安傳演歐陽炳強？︳電影LOL

曉格蘭特演變態佬 新片Heretic設局禁錮傳教少女︳電影LOL

《阿甘正傳》CP 湯漢斯羅冰韋特再合作 新片Here靠CG回春演活人生︳電影LOL

《史力加》有新搞作 第5集明年上映 驢友外傳製作中︳電影LOL

《玩轉腦朋友2》上映12日全球收逾7億美元 成今年票房之冠︳電影LOL

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！