雅虎香港新聞 《野孩子》內地電影公布映期後半日撤檔 真正原因眾說紛紜︳電影LOL
內地電影暑期檔展開，多套電影宣布「提檔」（提前上映），當中包括港產嘅《海關戰線》。但係其中一套片《野孩子》星期三（3日）上晝宣布提檔至7月10日上映，結果去到夜晚就宣布「撤檔」（暫緩上映），成為內地熱門話題。
《野孩子》以內地電視節目《今日說法》2018年關於一對流浪兄弟嘅報導改編。講述馬亮（王俊凱飾）因家庭原因靠拾荒維生，有日佢遇到同佢身世相約嘅六歲男孩軒軒（關子勰飾），令馬亮主動承擔起哥哥責任照顧軒軒。《今日說法》嘅報導引起廣泛討論，而現實中馬亮因盜竊罪入獄，觀眾都希望馬亮能夠重新做人。
題材吸引而且食正近年內地觀眾受落暖心溫情片口味，加上有位列一線嘅王俊凱，《野孩子》都係其中一套值得期待嘅暑假片。宣布提檔後，《野孩子》預售反應唔錯，半日已經有550萬元人民幣（下同）票房，內媒估計《野》總票房大約有三至五億元。不過《野孩子》宣布提檔當晚，片商突然喺官方平台表示「由於後期進度原因」而取消喺7月10日上映，而且未有交代確切映期。
內地片「提檔」「撤檔」唔係新鮮事，但同一日內「彈出彈入」都可能係第一次。唔少網民認為事有蹺蹊，冇理由公布映期半日後先知影片「後期進度」追唔上。《野孩子》「撤檔」原因，主流意見有2大睇法，首先係認為由於題材同主旋律唔配合，加上主人公馬亮犯事入獄，電影上映恐怕令事件喺道德同法律上嘅討論發酵。另一觀點係，同《野孩子》同期上映嘅仲有另一套由沈騰同馬麗主演嘅喜劇大片《抓娃娃》，兩套戲目標觀眾相若，正面交鋒的話《野孩子》可能未必有把握。
再講多次內地片「提檔」「撤檔」唔係新鮮事，而且「撤檔」後唔一定會仆。今年內地春節檔嘅《我們一起搖太陽》甚至係上映中途「撤檔」，延期到3月底重映，結果埋單票房有2億7500萬，比春節假期時收多大約2倍。
更多電影文章
海關戰線／意外／公開試當真／敢愛咁做／𝗗𝗼𝗹𝗽𝗵𝗶𝗻 躍動人生︳電影LOL 今期睇咩戲
《九龍城寨之圍城》逆市破1.1億票房封王 香港戲院上半年票房收入再跌17％︳電影LOL
紙盒藏屍案電影開拍中 Edan呂爵安傳演歐陽炳強？︳電影LOL
曉格蘭特演變態佬 新片Heretic設局禁錮傳教少女︳電影LOL
《阿甘正傳》CP 湯漢斯羅冰韋特再合作 新片Here靠CG回春演活人生︳電影LOL
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
