《史力加》有新搞作 第5集明年上映 驢友外傳製作中︳電影LOL

《玩轉腦朋友2》(Inside Out 2)收得，令荷里活終於有返啲話題。動畫片打盡一家大細，仲可以賣埋周邊產品，對於需要跑數嘅片廠而言簡直係救星。不過新IP要成功唔易，唯有繼續開續集同埋搵配角開外傳，冇新意不過有生意。

千禧世代應該都睇過《史力加》(Shrek)系列動畫電影，為主角史力加嘅老友「驢友」(Donkey）發聲嘅由黑人影星愛迪梅菲，早前接受外媒Collider訪問，提到已經開始為《史力加》第5集配音，預計套戲會喺明年上映。

愛迪梅菲受訪時順手爆埋，由驢友做主角嘅外傳電影亦已經製作中，但係幾時上映就未知。愛迪強調《史力加5》同《驢友外傳》係兩套戲，製作上有先後。

《史力加4》2010年上映後，《史力加5》呢個project已經傳咗好多年，直到去年再有消息指，擁有呢個IP嘅夢工場打算搵返原班人馬配音，即係由Mike Myers演史力加，Cameron Diaz演史力加老婆Fiona，而愛迪梅菲繼續做驢友。而舊年開始就有傳夢工場會開發《驢友外傳》，直到近期先得到證實。

《史力加》2001年推出時，以玩轉童話故事做賣點，公主可以變醜，男主角係怪獸唔係王子，當年都算係耳目一新，最起碼打破迪士尼壟斷動畫市場局面。第一集推出時全球狂收近5億美元，第2集更勁衝破9億元，之後嘅第3第4集成績冇前2集咁好，但係閒閒地都至少收7億美元，問你怕未。即使呢十幾年都冇新一集《史力加》推出，但係以片中角色貓貓劍客開發嘅外傳同樣收得，前年嘅《無敵貓劍俠：8+1條命》全球收4億8500萬美元。角色更突出而且多口嘅驢友，拍外傳應該更加好玩，收起呢隻牌而家先出，識玩。不過咁，可唔可以一圓小編嘅心願，搵NBA球員Draymond Green幫驢友配音？

更多電影文章

汪汪夢裡人／加菲貓：勇闖世界／地下殺神／維和防暴隊︳電影LOL 今期睇咩戲

《玩轉腦朋友2》上映12日全球收逾7億美元 成今年票房之冠︳電影LOL

《人工殺姬》拍情色版番外篇SOULM8TE 開拓殺姬宇宙︳電影LOL

《玩轉腦朋友2》收得 更不容有失 Pixar高層暗示新片《外星奇遇記》搵華裔導演石之予執手尾︳電影LOL

《三體》開拍電影版敲定張藝謀執導 如何處理文革情節再受關注︳電影LOL

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！