【Yahoo Lunch K・Backstage】聲夢十強誕生 被淘汰學員有咩打算?

·3 分鐘文章

今集【Yahoo Lunch K】請嚟五位《聲夢傳奇》嘅參賽者,分別有 Aska 張馳豪、Sherman 潘靜文、Venus 林沚羿、Lolita 蔡愷穎仲有火雞 孫漢霖,同咪霸 WaiWai 一齊唱歌傾計!

咁有年輕活力,咁熱鬧仲有咁多歌聽嘅一集大家記得要上Yahoo TV重溫喇!

五位參賽者喺《聲夢傳奇》嘅旅程就暫時告一段落喇,但對於佢地嚟講就正正係另一個起點。

講到離開咗《聲夢》嘅舞台,五位都不約而同咁表達唔捨得,當中火雞(孫漢霖) 就表示除此之外,仲感到非常感恩能夠學懂調整自己心態,始終面對觀眾一定會有正反兩面嘅聲音,能夠保持自己嘅心態去繼續做自己喜歡嘅事十分重要。仲希望可以擁有一首好成功嘅歌曲,令大家一聽就知係自己嘅歌,繼續延續《聲夢傳奇》嘅音樂夢。

火雞 (圖: 孫漢霖IG)
火雞 (圖: 孫漢霖IG)

而喺第一集就離開咗嘅Lolita (蔡愷穎) 話雖然第一集就已經被淘汰,但係能夠可以有機會踏上聲夢舞台,仲能夠識到一班一樣咁鐘意唱歌嘅朋友好開心,亦都希望可以繼續喺幕前發展,繼續唱歌畀大家聽,仲想試下唔同類型嘅節目拍攝,畀觀眾睇到唱歌以外嘅自己。

Lolita (圖: 蔡愷穎IG)
Lolita (圖: 蔡愷穎IG)

要追夢並唔係一件容易嘅事,要過重重難關之外,最重要當然係屋企人嘅支持,當中Venus (林沚羿) 話,屋企人本身都喺娛樂圈從事咗一段長時間,所以都好支持自己嘅決定,除咗唱歌之外原來Venus 由細到大都有修讀演戲,所以嚟緊好希望可以有多啲演戲拍劇嘅嘗試,努力令大家記得林沚羿呢個名!

Venus (圖: 林沚羿 IG)
Venus (圖: 林沚羿 IG)

Sherman 潘靜文喺訪問中提到完成咗聲夢唱歌嘅部分,可以好好咁探索一下除咗唱歌以外嘅發展,最想做到嘅就係拍劇,仲有好多人都提議佢嘗試嘅主持工作。期望自己有一日可以用實力去證明畀觀眾睇,自己係一位有價值的藝人。

Sherman (圖: 潘靜文 IG)
Sherman (圖: 潘靜文 IG)

筆者喺訪問中問到,要揀選一樣自己嘅好處,Aska (張馳豪) 就話係自己嘅初心,由開始報命參加比賽直到而家,自己都有好好咁記住初衷,能夠一直好好咁記住,亦希望能夠有屬於自己嘅歌。Aska仲分享咗,原來每一次上台比賽都會著紅色嘅底底旺一旺為自己帶嚟運氣,呢啲當然只係一啲小趣事,佢會繼續努力寫歌,唔會畀自己就咁停落嚟。

Aska (圖: 張馳豪 IG)
Aska (圖: 張馳豪 IG)

雖然被淘汰,但路唔止得一條,希望你哋每一個都能夠搵到最啱自己行嘅路,繼續努力追尋自己嘅理想,加油!

Sherman 潘靜文、Venus 林沚羿、Lolita 蔡愷穎、筆者 張潔瑩 Aska 張馳豪、火雞 孫漢霖
Sherman 潘靜文、Venus 林沚羿、Lolita 蔡愷穎、筆者 張潔瑩
Aska 張馳豪、火雞 孫漢霖

睇更多YAHOO LUNCH K BACKSTAGE內容:

【Yahoo Lunch K・Backstage】何雁詩恨生B 自資出碟後最想挑戰跳舞歌

【Yahoo Lunch K・Backstage】區子琳點入行?林奕匡提師妹最緊要Enjoy

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能