雅虎香港新聞 【Yahoo Lunch K・Backstage】何雁詩恨生B 自資出碟後最想挑戰跳舞歌
今次【Yahoo Lunch K】嘅嘉賓係最近成為獨立歌手、推出咗第一隻自資EP 《Que Sera Sera》嘅Stephanie 何雁詩！
為Yahoo嘅觀眾帶嚟最新歌曲《灰夠》同埋幾隻收錄喺EP裡面嘅歌，當然唔少得同我地嘅咪霸合唱啦！
自資出碟一啲都唔容易，Step表示所有嘢一腳踢都幾辛苦，但係見住隻碟出世咩都抵番哂啦！
講到以獨立歌手嘅身份自資出碟Step就話覺得呢個身份喺現階段都覺得幾開心，可以自由啲去做決定，做多啲自己想做嘅嘢。同時都對簽唱片公司抱住一個開放嘅態度，話如果能夠搵到一間同自己想法一致嘅公司，絕對有機會合作！
問到佢嚟緊喺音樂上仲希望有咩新嘅嘗試，Step竟然答係跳舞歌！原來佢一直都好鍾意Disco Pop類型嘅歌，希望可以挑戰下唔係好叻跳舞嘅自己。
Step仲為咗令自己更加了解音樂製作嘅過程，將會讀一個為期一年嘅課程，希望嚟緊造多啲好歌俾大家聽！
講完音樂，當然要講下成為人妻之後嘅生活啦！
原來Step喺結婚前以為婚後嘅生活應該唔會有太大變化，畢竟日日見，又一齊住，都係多咗隻戒指啫！
不過到真係多咗鄭太呢個身份之後就發覺，自己好似突然顧及另一半多咗，會照顧對方嘅起居飲食，當諗到將來嘅時候係會以一個整體去諗。
筆者問，除咗音樂之外未來仲會有咩大計呢？
Step頓時母性大發：「生BB!」。
Step 同 Fred 都好鍾意小朋友，Step仲試過夢見自己生BB! 不過亦都坦言因為疫情影響之下，收入大減，希望經濟狀況穩定番之後先有小朋友。先用呢幾年做多啲音樂，專心事業。第一個要完成嘅心願係去左Honeymoon 先，仲話就算要隔離都去呀！
希望你哋早日去到Honeyｍoon再帶多個家庭成員返嚟喇！
睇更多YAHOO LUNCH K BACKSTAGE內容：
