反黑英雄丨陳山聰朱晨麗演過氣情人狂鬥嘴 傅嘉莉犧牲形象以「師奶曲髮」登場

TVB和騰訊視頻聯手製作嘅劇集《反黑英雄》將於今晚（24日）起星期一至五晚上8時30分翡翠台播出，演員包括陳山聰、張振朗、袁偉豪、張頴康、朱晨麗、姚子羚、傅嘉莉、黃子恆、林景程及何沛珈等人，劇情由2019年發生的一單槍擊案展開，主打「港式暴力美學」，喺橫街窄巷及鬧市中上演搏鬥情節，以及黑幫之間嘅惡鬥招數。劇集除咗由去年叫好叫座嘅《新聞女王》總監製鍾澍佳和《星空下的仁醫》監製方浤酌強強聯手，更是姚子羚首度挑戰江湖大嫂，非常有睇頭。另外，劇中亦有三對極具新鮮感嘅CP，包括陳山聰與朱晨麗、張振朗與姚子羚、張頴康與傅嘉莉。

陳山聰於劇中飾演PTU警長關智軒，朱晨麗則飾演反黑組督察彭穎琪，呢對過氣情人因工作經常碰頭，鬥嘴之餘更攜手打擊罪犯；二人亦於劇中有唔少驚險動作場面，陳山聰曾透露，為咗真實場面更逼真，有好多動作場面都係親身上陣。張振朗於劇中飾演徐賢，為潛伏社團中嘅卧底，係一個忠奸難辨嘅角色；姚子羚則演繹硬朗嘅社團阿嫂林雪兒，二人為初戀關係，因命運安排愈走愈遠，張振朗加入黑幫後，雖然深信舊情不再，但就默默守護對方。不過姚子羚於劇中有老公，二人都未有太親密嘅戲份。張頴康飾演PTU警長蘇國威，與太太珊珊（傅嘉莉飾）育有三名子女，為咗子女升學嘅問題鬧出唔少事端。

除咗有三對CP首次合作，傅嘉莉於劇中形象甚有驚喜，對比以往唔再以性感造型登場，反而以「師奶曲髮」搭配街坊裝扮演繹虎媽，傅嘉莉透露角色造型係與佳導一齊設計，即使對比以往嘅角色造型未必係最好睇，但覺得真係好啱呢個角色。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！