叱咤2023︳坐足一晚食白果 尹光幫陳蕾執衫被封暖男贏正評

有份角逐我最喜愛的男歌手嘅尹光，獲大會安排壓軸出場，更坐喺觀眾席最前排。唔少網友話要推光B上台，但係最終我最喜愛的男歌手由張敬軒贏得，尹光坐足一晚冇獎攞但仍然笑容滿面。有網民更留意到，坐尹光隔離嘅陳蕾得獎後除低外套上台，但係件衫跌咗落地，尹光好有風度咁幫陳蕾執返。光B呢個舉動被大讚係暖男，可以話係雖敗猶榮。

叱咤2023總結︳陳蕾張敬軒贏我最喜愛的男女歌手 姜濤連續4年贏我最喜愛的歌曲

叱咤2023 完整得獎結果︳張敬軒擊敗尹光 MIRROR3子贏我最喜愛的男歌手 陳蕾掃4獎成大贏家

79歲嘅尹光原名呂鍚楊，係越南華僑，年幼時屋企家境富裕，曾經擁有戲院並邀請香港歌星到當地登台，因此接觸音樂。尹光後來因為越戰於70年代逃到香港，並展開歌唱事業，除咗到夜總會登台之外，亦有推出個人歌曲。尹光嘅歌好多都以市民生活為題材，例如刻劃小巴司機生活嘅《十四座》，仲有詼諧嘅《一個黐膠線的少年》、《你阿媽大減價》等。因為尹光嘅唱片主要喺廟街唱片鋪同攤檔出售，因此被冠以「廟街歌王」。

尹光80年代走場演唱而賺個不少，到1991年尹光首次登上紅館，成為事業嘅轉捩點，令佢由廟街同酒廊走上大舞台。但原來「光B」話當時夜場演出減少，曾經喺越南生活嘅佢轉行做買貨，做咗幾個月後「演唱會之父」張耀榮搵尹光開紅館show。原來張耀榮當年為某歌手舉行10場個唱，殊不知做咗7場就冇做，張生向來欣賞尹光，就邀請佢做埋嗰3場檔期。尹光個唱銷情開頭麻麻，到開show前幾日都係賣得2千幾張飛，但到正式演出日下晝，紅館外排隊買飛人龍打蛇餅，賣飛賣到過咗開show時間嘅9點先停，總共賣咗8千幾張飛。後來尹光喺1991年三度登上紅館，成為一時佳話。

去年光B被網民以A.I技術惡搞製作「翻唱版」《一人之境》及Dear My Friend, 而再次爆紅，後來尹光更於演唱會上正式演唱呢2首歌。而尹光亦推出單曲Dear Myself，並打入叱咤榜，後來更喺樂迷投票嘅叱咤樂壇我最喜愛的男歌手殺入5強，砌低當時得令嘅林家謙同MC張天賦。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！