「地道」星期五影院：《流氓醫生》

香港人除咗關心土地問題，都好關注一班醫護人員嘅工作狀況，醫護前線工作爆哂煲，都係得到魚蛋燒賣同條「打氣」片，真係做到無哂mood。可幸佢地幾辛苦都仍然專業好有醫德，用錢買唔到品格同操守，不過我地做小市民都希望醫護人員可以擭得更好嘅待遇，減少人才流失！

今日介紹套同醫生有關係嘅港產片，1995年由李志毅導演，梁朝偉、劉青雲、鍾麗緹、杜德偉及許志安主演嘅《流氓醫生》。電影改編自日本漫畫，不過改得好好，本土味濃到唔覺係日漫。故事講述醫術高明嘅劉文（梁朝偉 飾）於龍蛇混雜嘅地區執業，佢嘅病人有附近街坊、流鶯、社團人士等等，既係醫生病人關係，又如朋友般相處。

一日，因為一宗打劫案，賊人被卧底探員阿超（劉青雲 飾）打傷，劉文陪同傷者到醫院治療，因此認識咗見習醫生阿蘇（許志安 飾）及重遇舊同學、現成為名醫嘅左自杰（杜德偉 飾）。左一直妒忌劉文嘅才華，為咗鏟除劉文對自己於醫學界嘅威脅，佢將劉嘅醫學研究據為己有，仲用盡辦法吊銷劉文醫生牌。其後因為受重傷，劉文不計前嫌幫佢做手術救返條命後，決定改過自身。

《流》入面嘅劉文會彈結他、會飲酒追女仔，外表不修邊幅，但處處以病人健康為先，超有醫德同愛心。其中一幕賊人頭部中槍，成班醫生討論點樣攞返粒子彈又唔會破壞証物：左醫生嘅方法保存到証物但令賊人有後遺症；劉文建議借助乾冰冷縮熱脹嘅原理，收縮子彈再拑出，劉唔關心証物會否受損，因為醫生嘅責任就係用最好嘅方法嚟救傷者！

左自杰同劉文分別代表咗制度內同制度外嘅人，2個都有高明嘅醫術，同樣受不同因素所限；左會受管理層、職權左右； 劉就因為無牌，醫術再好都唔可以行醫。2位嘅共通點就係專業同稱職，亦係香港人值得自豪嘅特質。

值得一提，《流》嘅副線都好精彩，阿超同妓女阿湄（童愛玲 飾）、阿蘇同身患絕症女子阿仙（徐濠縈 飾）嘅感情戲；鮑教授（吳耀漢 飾）病重決定大吃大喝投入溫柔鄉，仲有當年仲係學生妹兼飾演學生妹嘅梁詠琪等等！